24.06.2017

رێبه‌ر ئاپۆ بووژێنه‌ری هه‌ست و تێگه‌ (2)

رێبه‌ر ئاپۆ راستینه‌ ترسناکه‌که‌ی کورد واته‌ خیانه‌تکاری بینی و به‌رهه‌ڵستکارییه‌که‌ی له‌ به‌رامبه‌ر ئه‌مه‌دا نیشان دا...

 

 

 

 

عه‌لی حه‌یده‌ر قایتان

به‌شی دووه‌م و کۆتایی

پێویسته‌ پێداگری له‌سه‌ر ئه‌م راستینه‌یه‌ بکرێ که‌ سه‌قه‌تی نێو هه‌سته‌کانمان سه‌رچاوه‌ی سه‌ره‌کی لاوازبوونی گردان و په‌یوه‌ستیمانه‌ به‌ سه‌رۆکایه‌تییه‌وه‌. زۆرجار خۆشه‌ویستیمان خۆشه‌ویستی نییه‌، توڕه‌یی و که‌لله‌یبوونیمان توڕه‌یی نییه‌ و نه‌فره‌تیشمان هه‌ر به‌ نه‌فرت ناژمێردرێ. "نه‌خێر"مان به‌ره‌و دابڕان و "به‌ڵێ"مان به‌ره‌و فه‌تحکردن نامانبات. ئا لێره‌دا که‌سێتییه‌کی ساخته‌، که‌سێتییه‌کی درۆزن، که‌سێتییه‌کی دووڕوو له‌ ئارادا هه‌یه‌.

ئه‌مه‌ شتێک نییه‌ گه‌وره‌ کرابێ. کاتێک به‌ قوڵایی بیری لێ ده‌که‌ینه‌وه‌، ئه‌نجامی هه‌ره‌ به‌کاریگه‌ر که‌ پێی ده‌گه‌ین ئه‌مه‌یه‌. له‌ راستیشدا به‌رهه‌ڵستکاری رێبه‌ر ئاپۆ له‌ به‌رامبه‌ر ژیانی ئه‌مڕۆ هێنده‌ دژواره‌، مافی کۆمه‌ڵایه‌تیبوونی راستیینه‌ی دایک ره‌ت ده‌کاته‌وه‌ که‌ هێزی بناخه‌یی کۆمه‌ڵایه‌تیبوونه‌ و له‌ هه‌بوونی مرۆڤایه‌تیدا راستیینه‌یه‌کی بنچینه‌ییه‌. بێگومان دایک حه‌ز ده‌کات شتێک بداته‌ منداڵه‌که‌ی، به‌ڵام شتێکی نییه‌ که‌ پێی بدا. بۆ نموونه‌، دایک نیشتمانێکی نییه‌ که‌ بیدا به‌ منداڵه‌که‌ی، ژیانێکی ئازادی نییه‌، هیچ به‌ها و نرخێکی به‌کاریگه‌ری نییه‌ که‌ پێی بدات. تاکه‌ شتێک که‌ پێی دابێت و پێی بدات، وه‌ک رێبه‌ر ئاپۆ گوزاره‌ی لێوه‌ ده‌کات، ده‌ستکێکی ژیانی ده‌داته‌ ده‌ست. ئه‌مه‌ش له‌ کاتێکدایه‌ که‌ دایک خۆی له‌مه‌ بێبه‌ری ده‌کات و ده‌یه‌وێ ئه‌و ده‌ستکه‌ بداته‌ ده‌ستی منداڵه‌که‌ی که‌ به‌شی خودی دایک خۆی بووه‌. به‌رهه‌ڵستکاری سه‌رۆکایه‌تی له‌ به‌رامبه‌ر ئه‌مه‌یه‌. ئه‌و ژیانه‌ کۆمه‌ڵایه‌تییه‌ی که‌ دایک بۆ منداڵه‌که‌ی ئاماده‌ ده‌کات، شایانی ژیان نییه‌ و له‌ ره‌وشی ئاوه‌ڕۆیه‌کدایه‌. رێبه‌ر ئاپۆ ناکه‌وێته‌ نێو ئه‌و ئاوه‌ڕۆیه‌وه‌ و جێگه‌ی تێدا ناگرێ. له‌م روانگه‌یه‌وه‌ بناخه‌ی به‌رهه‌ڵستکردن لێره‌دایه‌، له‌ ره‌تکردنه‌وه‌ی مافی کۆمه‌ڵایه‌تیکردنی دایک و له‌و ژیانه‌ کۆمه‌ڵایه‌تییه‌دایه‌ که‌ دایک بۆ منداڵه‌که‌ی ئاماده‌ ده‌کات و هیچ شیاوی ژیان نییه‌.

مرۆڤ بوونه‌وه‌رێکی سۆسیاله‌، مانایه‌کی ئه‌وه‌ش ئه‌مه‌یه‌: مرۆڤ له‌ ره‌وشێکی کۆمه‌ڵایه‌تیدا بوونی ده‌بێ، کۆمه‌ڵایه‌تی شێوازی هه‌بوونی مرۆڤایه‌تییه‌. واتا ئه‌گه‌ر کۆمه‌ڵایه‌تی نه‌بێ، ئه‌وا تاکی ئازادیش نابێت. له‌م روانگه‌یه‌شه‌وه‌ رێبه‌ر ئاپۆ کۆمه‌ڵایه‌تی ئه‌مڕۆ ره‌ت ده‌کاته‌وه‌ و روو ده‌کاته‌ بونیادنانى کۆمه‌ڵایه‌تی خۆی. لێره‌دا شتێکی دیکه‌ش هه‌یه‌: ده‌شێ رێبه‌ر ئاپۆ مافه‌ کۆمه‌ڵایه‌تییبوونه‌که‌ی دایک ره‌ت بکاته‌وه‌، به‌ڵام باش ده‌زانێ ژیانی ته‌نها له‌ پاراستنی شه‌ره‌ف و نامووسی دایکیدایه‌ و زۆر به‌ پێویستیشی زانیوه‌ که‌ ته‌نها بۆ تاکه‌ساتێکیش ئه‌مه‌ی له‌بیر نه‌کردووه‌. ده‌بێ ناموس و شه‌ره‌فی دایک بپارێزێ، ئه‌مه‌ش تاکه‌ هه‌ل و مه‌رجی ژیانه‌.

که‌واته‌ پێویسته‌ باش له‌ دایکایه‌تی تێبگه‌ین. دایکایه‌تی چییه‌؟ دایکایه‌تی هه‌بوونێک یان بوونه‌وه‌رێک نییه‌ که‌ ته‌نها به‌ منداڵ هێنانه‌وه‌ سنووردار بێت. نابێ دایک وه‌ک ئامێرێکی کڕکه‌وتن ببینرێ! به‌داخه‌وه‌ ئه‌مه‌ ئه‌و ره‌وشه‌یه‌ که‌ سیستمی شارستانییه‌ت دایکی تێدا خنکاندووه‌. به‌ پێچه‌وانه‌وه‌ دایک هێزێکی کۆمه‌ڵایه‌تییه‌، دایکایه‌تی سیستمێکه‌، دایکایه‌تی هێنده‌ی ئاماده‌کردنی منداڵ‌ بۆ کۆمه‌ڵگا، له‌ هه‌مان کاتدا له‌ ئاستی دایکێکی ئه‌و کۆمه‌ڵگایه‌دایه‌ که‌ منداڵه‌که‌ی بۆ ئاماده‌ ده‌کات و هێزی بونیادنه‌ر و به‌ڕێوه‌بردنێتی. به‌ڵام ئه‌مه‌ له‌ هه‌موو قۆناخێکدا هه‌ر به‌و شێوه‌یه‌یه‌؟ بێگومان نه‌خێر. کاتێک له‌ ماجه‌رای هه‌بوونی مرۆڤ ده‌ڕوانین، ده‌شێ ئه‌م تایبه‌تمه‌ندییه‌ی دایک زۆر به‌ ئاسانی له‌نێو قۆناخی مێژووی ملیۆن ساڵی ئه‌م پێشکه‌وتنانه‌دا ببینین. به‌ڵام پاش وه‌ده‌رنانی کۆمه‌ڵگای سرووشتی دایک له‌ که‌سێتی ژندا دووچاری که‌وتن بۆته‌وه‌ و هێزی سیستماتیکی به‌ جارێک لی ده‌سه‌نرێت. دایک هێزی کۆمه‌ڵایه‌تی و به‌کۆمه‌ڵگاکردنی له‌ده‌ست وه‌رگیراوه‌. له‌م روانگه‌یه‌شه‌وه‌ پاراستنی ناموس و شه‌ره‌فی دایک، داهێنانى سیستمی ژیان و ژیاندنی کۆمه‌ڵایه‌تی خۆیه‌تی که‌ خودی خۆی هێزی به‌رجه‌سته‌یه‌تی. تا ئه‌م سیستمه‌ نه‌خوڵقێنرێ، ناتوانرێ له‌ واتایه‌کی راسته‌قینه‌دا باس له‌ شه‌ره‌ف و ناموسی دایک بکرێ. تا کۆمه‌ڵگای سه‌ره‌تایی له‌سه‌ر بناخه‌ ته‌کنیکه‌ زانستییه‌کان سه‌رله‌نوێ نه‌ژیێنرێته‌وه‌، به‌و واتایه‌ دێت که‌ به‌ هیچ شێوه‌یه‌ک قه‌رزی دایک نه‌دراوه‌ته‌وه‌.

له‌ کوردستاندا به‌رزبوونه‌وه‌ له‌ چه‌مکێکی سووک و ساکاربووی نامووسه‌وه‌ به‌ره‌و چه‌مکێک که‌ له‌ سه‌ره‌وه‌ ئاماژه‌مان پێ دا، بۆته‌ تایبه‌تمه‌ندییه‌کی بناخه‌یی رێبه‌ر ئاپۆ که‌ هه‌ر له‌ منداڵییه‌وه‌ تێیدا به‌دی کراوه‌. ئه‌مه‌ش یه‌کێکه‌ له‌ تایبه‌تمه‌ندییه‌ سه‌ره‌کییه‌کانى پێگه‌ و هه‌ڵوێستی سه‌رۆکایه‌تی. رێبه‌ر ئاپۆ له‌ پاش یه‌که‌مین ناخۆشی له‌گه‌ڵ‌ دایکیدا ته‌واوى هه‌وڵدانه‌کانى له‌ پێناو بنیادنانى کۆمه‌ڵایه‌تی خۆیدا بووه‌. ئه‌گه‌ر ده‌تانه‌وێ بژین، له‌به‌ر ئه‌وه‌ی ژیان پێویستی به‌ هه‌بوونی کۆمه‌ڵگایه‌، چ وه‌ک خاوه‌نێکی کۆمه‌ڵگا و یاخود وه‌ک ئه‌ندامێک، ناچارن بژین. مرۆڤی ته‌نها نییه‌. چه‌نده‌ واتایی و مه‌عنه‌وی لێکی ده‌ده‌نه‌وه‌ خۆتان ده‌زانن، به‌ڵام ناتوانن مرۆڤی ته‌نها بدۆزنه‌وه‌. مرۆڤی ته‌نها، ته‌نها به‌رهه‌می ئیتۆپیایه‌ک یاخود به‌رهه‌می لێکدانه‌وه‌یه‌کی له‌ڕاده‌به‌ده‌ری مه‌عنه‌وییه‌. له‌م روانگه‌یه‌شه‌وه‌ ئه‌و مرۆڤه‌ی ده‌یه‌وێ به‌ ئازادی بژی، ناچاره‌ کۆمه‌ڵگایه‌کی ئازاد بونیاد بنێت. هه‌ر له‌به‌ر ئه‌مه‌ش رێبه‌ر ئاپۆ هه‌ر له‌ منداڵییه‌وه‌ ده‌که‌وێته‌ نێو هه‌وڵ و ته‌قه‌لای بونیادنانى کۆمه‌ڵایه‌تیبوونی خۆی. هه‌موو ناخۆشییه‌کیشی له‌گه‌ڵ‌ دایکیدا هه‌ر له‌سه‌ر ئه‌م کۆمه‌ڵایه‌تیبوونه‌یه‌. ده‌یه‌وێ ئه‌وه‌ی خۆی بونیاد بنێت، له‌گه‌ڵ‌ هاوڕێکانیدا ده‌ست پێده‌کات و سه‌رکه‌وتن به‌ده‌ست دێنێت. رێبه‌ر ئاپۆ بۆ بنیادنانى کۆمه‌ڵایه‌تیبوون وه‌ک یه‌که‌مین هه‌ل، رووی کردۆته‌ به‌ پارتیبوونێک که‌ چیمه‌نتۆی کۆمه‌ڵایه‌تیبوونه‌ و ده‌شێ وه‌ک یه‌کینه‌ی هاوڕێیه‌تی راسته‌قینه‌ش هه‌ڵبه‌سنگێنرێ. پارتی له‌ گه‌وهه‌ری خۆیدا کۆمه‌ڵگای هه‌ڤاڵێتییه‌، یه‌کینه‌ی هه‌ڤاڵێتی دۆز و داوایه‌، کۆمه‌ڵگای مرۆڤی پێشه‌نگ و فیداییه‌ که‌ بۆ ئه‌نجامگیرکردنی داوایه‌کی هاوبه‌ش له‌ یه‌کتر کۆ بوونه‌ته‌وه‌. رێبه‌ر ئاپۆ که‌وتبووه‌ نێو ئه‌م هه‌ڵمه‌ته‌وه‌. لێره‌دا تایبه‌تییه‌ک هه‌یه‌ که‌ پێویسته‌ جه‌ختی له‌سه‌ر بکرێته‌وه‌؛ رێبه‌ر ئاپۆ له‌ بونیادنانی کۆمه‌ڵگایه‌کی نوێدا تا دواڕاده‌ به‌ دڵسۆزیی و به‌ بڕیاره‌. تا دواڕاده‌ په‌یوه‌ستی و گرێدانێک هه‌یه‌ له‌ به‌رامبه‌ر ئازادی گه‌لدا. واتا به‌گه‌لبوون و به‌کۆمه‌ڵگابوون خاڵی بناخه‌یین. گروپه‌ چه‌په‌کانی دیکه‌ له‌ تورکیادا، له‌ کاتێکدا بوونه‌ته‌ مه‌زهه‌بگه‌را، به‌ڵام ئه‌م به‌بڕیاربوونه‌ی سه‌رۆکایه‌تی، بزووتنه‌وه‌ی په‌که‌که‌ی له‌ کوردستاندا به‌ره‌و به‌رزبوونه‌وه‌ و گه‌وره‌بوون بردووه‌. له‌ قۆناخه‌کانى دواى ئه‌ویشدا هه‌ر ئه‌مه‌یه‌ بۆته‌ هۆکاری ئه‌وه‌ی که‌ لێگه‌ڕینه‌کان سه‌رۆکایه‌تی به‌ره‌و چاره‌سه‌ری ده‌بات.

رێبه‌ر ئاپۆ له‌ منداڵیه‌وه‌ ده‌ست پێده‌کات و سیستمی فیۆداڵی که‌ تێپه‌ڕبوون لێی ئه‌سته‌مه‌ و سیستمی ئه‌مڕۆی کاپیتالیستی له‌ که‌سایه‌تی خۆیدا به‌رجه‌سته‌ نه‌کردووه‌. ئه‌م سیستمانه‌ به‌ هیچ جۆرێک خۆی له‌ رێبه‌ر ئاپۆ دا به‌رجه‌سته‌ ناکات و ئه‌مه‌ش خۆی به‌ وته‌ی "من به‌وشێوه‌یه‌ ناژییم" هه‌ڵوێستی که‌سایه‌تی خۆی له‌م باره‌یه‌وه‌ ده‌ستنیشان کردووه‌. سه‌رۆکایه‌تی به‌ هیچ شێوه‌یه‌ک نه‌بوو مرۆڤێکی ئه‌م سیستمه‌، کاتێک له‌م په‌نجه‌ره‌یه‌شه‌وه‌ ده‌ڕوانین، ده‌شێ بوترێ، سه‌رۆکایه‌تی هیچ کاتێ له‌ خیانه‌ته‌وه‌ نه‌گلا و له‌ کوردستانیشدا له‌م لایه‌نه‌وه‌ وه‌ک تاقانه‌یه‌ک مایه‌وه‌. ده‌شێ به‌م شێوه‌یه‌ش گوزاره‌ی لێوه‌ بکرێ؛ له‌ خیانه‌ته‌وه‌ گلان ته‌نها نایه‌ته‌ مانای تێوه‌گلان له‌ بیانیبوونی کورد یان ده‌ستوردان به‌م کاره‌. نا، ناتوانرێ به‌م شێوه‌یه‌ هه‌ڵبسه‌نگێنرێ. تێوه‌گلان له‌ خیانه‌ته‌وه‌ زۆر له‌ولای ئه‌مه‌وه‌یه‌ و ده‌شێ به‌ولا تریشه‌وه‌ ببرێ. یه‌که‌مین دیارده‌ی خیانه‌ت له‌ به‌رامبه‌ر مرۆڤایه‌تی، یه‌که‌مین په‌لامار بۆ سه‌ر هزر و فکری له‌ کوێوه‌ ده‌ست پێده‌کات؟ خیانه‌ت و نه‌فرینی مرۆڤایه‌تی له‌گه‌ڵ‌ پێکهاتنی سیستمی شارستانی، له‌گه‌ڵ‌ له‌دایکبوونی سیستمی هیه‌رارشی و کۆمه‌ڵگای ده‌وڵه‌تگه‌را ده‌ست پێده‌کات. هزری مرۆڤ بۆ یه‌که‌م جار توشی په‌لاماردان دێ، بۆ جاری یه‌که‌م ژیان توشی خیانه‌ت ده‌بێت، درۆ ده‌که‌وێته‌ نێو ژیانه‌وه‌. چونکه‌ کۆمه‌ڵگای ده‌وڵه‌تی، خودی سیستمی شارستانییه‌تی ده‌وڵه‌تگه‌را سیستمێکی پشتبه‌ستووه‌ به‌ درۆ و ده‌له‌سه‌. ئه‌وه‌ی له‌ درۆوه‌ بگلێ، له‌ خیانه‌تیشه‌وه‌ ده‌گلێ. بۆ ئه‌مه‌ش هه‌ڵوێست له‌ به‌رامبه‌ر سیستمی شارستانى ده‌وڵه‌تگه‌رادا، هه‌ڵوێسته‌ له‌ به‌رامبه‌ر خیانه‌ت، هه‌ڵوێسته‌ له‌ به‌رامبه‌ر تێوه‌گلاندنی مرۆڤایه‌تییه‌ به‌ خیانه‌ت.

نه‌ک ته‌نها به‌ره‌و راستینه‌ی کورد، به‌ڵکو کاتێک گه‌شتێک به‌ره‌و گه‌یشتن به‌ ره‌گ و ریشه‌ی مێژوویی ده‌که‌ن، ده‌شێ به‌ شێوه‌یه‌کی زۆر سه‌رنجڕاکێش و به‌کاریگه‌ر ئه‌م راستینه‌یه‌ ببینن. له‌ راستیدا ده‌شێ له‌ سه‌رچاوه‌ی پێکهاته‌ی مرۆڤایه‌تیدا و سه‌رچاوه‌ی پێشکه‌وتنی مرۆییانه‌دا راستینه‌ی کورد هه‌بێ، هه‌م وه‌ک مرۆڤ و هه‌م له‌ بواری جوگرافییه‌وه‌ راستینه‌ی کوردستان بۆته‌ بێشکه‌ی مرۆڤایه‌تی و دایکایه‌تیشی کردووه‌. له‌ سه‌ره‌تادا مرۆڤی کورد به‌رگری له‌ نرخه‌کانی شۆڕشی نیۆلۆتیک ده‌کات، بۆ به‌رگریکردن له‌مه‌ش ده‌که‌وێته‌ نێو به‌رخۆدانییه‌وه‌، به‌ڵام له‌ قۆناخه‌کانى دواتردا، زیاتر له‌ ئه‌نجامی راده‌ستبوونیان به‌ هێزه‌کانی شارستانییه‌تی ده‌سه‌ڵاتداره‌کان و که‌وتنه‌ ره‌وشێکی خوڵامییانه‌وه‌ بۆ ئه‌وان و یه‌کگرتن له‌گه‌ڵیاندا، راستینه‌ی کۆمه‌ڵایه‌تی کورد له‌ خیانه‌ته‌وه‌ ده‌گلێ. به‌ڵام دواتردا ئه‌مه‌ ده‌که‌وێته‌ پێگه‌ و قۆناخێکی وه‌هاوه‌ که‌ له‌ راستینه‌ی کورددا تاکه‌مرۆڤێک نامێنێت که‌ له‌ خیانه‌ته‌وه‌ نه‌گلابێ. کورد وه‌ک بڵێی دواتر ده‌بێته‌ خیانه‌تکاری خۆی و ره‌گه‌زی خۆی.

 له‌م روانگه‌یه‌شه‌وه‌ گه‌ر له‌ بێشکه‌ی مرۆڤایه‌تیدا کورد و کوردستان هه‌یه‌ و سه‌رچاوه‌که‌ی ئێره‌یه‌، گه‌ر پێویسته‌ هێزی خوڵقێنه‌ر، پێکهێنه‌ر، په‌ره‌پێده‌ر و هێزی به‌رگریکه‌ر ئه‌مه‌یه‌، ئه‌وا ئه‌وکات به‌ر له‌ هه‌موو شتێک دوورکه‌وتنه‌وه‌ له‌مه‌ و تا ده‌چێت دابڕان و خۆدزینه‌وه‌ لێی دێته‌ واتای ئه‌وه‌ی که‌ ده‌بێته‌ راده‌ستبووی نه‌فرین و له‌عنه‌ت. ده‌شێ هه‌موو که‌س خیانه‌ت له‌م بێشکه‌یه‌ بکات، به‌ڵام پێکهێنه‌ر و گه‌شه‌پێده‌ر نرخه‌کانی نێو ئه‌م بێشکه‌یه‌ و ئه‌وانه‌ی که‌ پێویسته‌ به‌رگری لێ بکه‌ن، خیانه‌تی لێ ناکه‌ن. چونکه‌ ئه‌وانه‌ى خاوه‌نی راسته‌قینه‌ى ئه‌و به‌ها و نرخانه‌ن، ئه‌وانه‌ی دیکه‌ له‌سه‌ر ئه‌م خۆیان به‌مه‌وه‌ ده‌بیننه‌وه‌. چۆن دایکێک به‌ هیچ شێوه‌یه‌ک خیانه‌ت له‌ منداڵه‌که‌ی خۆی ناکات و له‌ به‌رامبه‌ر رۆڵه‌که‌یدا ناکه‌وێته‌ نێو خیانه‌ته‌وه‌. شتێکی وه‌هاش له‌نێو کاراکته‌ر و تایبه‌تمه‌ندییه‌کانیدا نییه‌. هه‌ر به‌وشێوه‌یه‌ش کورد پێویست بوو خاوه‌ندارێتی له‌ به‌ها و نرخه‌کانی خۆی بکات، به‌ڵام به‌ پێچه‌وانه‌وه‌ کورد که‌وتنه‌ پێگه‌ی خیانه‌تکاری خۆیه‌وه‌. به‌ داخه‌وه‌ ئه‌مه‌ش له‌نێو حه‌یران و لۆریک و لاواندنه‌کانیشماندا ره‌نگی داوه‌ته‌وه‌. هۆزانه‌کانمان، ئه‌و هونه‌رمه‌ندانه‌ی که‌ هیچ ئاشنای زانستیش نه‌بوون، به‌ روانین له‌م هه‌ڵدێرییه‌ی کوردان، وتوویانه‌ "کورد خیانه‌تکاره‌". ئه‌وه‌ی گوێ له‌ لاوانه‌وه‌کانی ــ کاویس ئاغا ــ بگرێ، گوته‌ی "کورد خیانه‌تکاره‌" ده‌بیسێ.

رێبه‌ر ئاپۆ ئه‌م راستینه‌ ترسناکه‌ی بینی و به‌رهه‌ڵستکارییه‌که‌ی له‌ به‌رامبه‌ر ئه‌مه‌دا نیشان دا. ئه‌مه‌ش خاڵی سه‌ره‌کی و بناخه‌ییه‌ له‌ ده‌رکه‌وتنی سه‌رۆکایه‌تیشدا. ده‌شێ بوترێ که‌ هه‌ر که‌س ده‌توانێ ئه‌م راستیانه‌ ببینێ. ده‌شێ بوترێ بینین هونه‌رێک نییه‌ که‌ ته‌نها تایبه‌ت بێت به‌ سه‌رۆک، ئه‌مه‌ نه‌ک به‌ته‌نها به‌ گوتن به‌ڵکو راستینه‌یه‌کیشه‌. پێویسته‌ له‌م خاڵه‌دا هه‌ستیار بین رێبه‌ر ئاپۆ مه‌سه‌له‌یه‌که‌ که‌ نه‌ ده‌بێ گه‌وره‌ بکرێ و نه‌ بکرێته‌ مه‌سه‌له‌یه‌کی خوداوه‌ندیانه‌. با بڵێین هه‌موو که‌سێک ئه‌م راستییانه‌ ده‌بینێ، به‌ڵام بینینی راستییه‌کان جیایه‌ و لێگه‌ڕینی مرۆڤی راسته‌قینه‌ جیاوازه‌؛ بینینی ره‌وشی هه‌نوکه‌ جیایه‌ و دۆزینه‌وه‌ی مرۆڤێک که‌ ئه‌مه‌ ره‌ت بکاته‌وه‌ و هه‌موویان تێپه‌ڕ بکات جیاوازه‌. ده‌شێ ئێوه‌ به‌رهه‌ڵست بن له‌م خاڵه‌دا، به‌ڵام له‌نێو ئه‌و شتانه‌دا که‌سانێک هه‌ن که‌ ره‌تی ده‌که‌نه‌وه‌. ده‌شێ به‌رهه‌ڵستی بکه‌ن، به‌ڵام تا بینه‌قاقاتان له‌نێویدان؛ ده‌گرین و ده‌ست به‌ نوزه‌نوز ده‌که‌ن، به‌ڵام په‌نابرده‌ی بێچاره‌یین و له‌نێو ئه‌و شته‌دا ده‌ژین که‌ بۆی ده‌گرین. رێبه‌ر ئاپۆ نه‌که‌وته‌ نێو ژیان و بوژینه‌وه‌ی ئه‌مه‌، جیاوازی ئه‌و لێره‌دایه‌. رێبه‌ر ئاپۆ هێزی ئه‌مه‌ی به‌رهه‌م هێنا. ئه‌و به‌ گوێره‌ى گوزاره‌که‌ی خۆی، منداڵی هه‌ره‌ داماو بوو له‌نێو ده‌وروبه‌ره‌که‌یدا. سه‌رۆکایه‌تی ئه‌م فکره‌ی خۆی به‌ وشه‌ و ده‌سته‌واژه‌ی زۆر روون و ئاشکرا خسته‌ڕوو و ده‌ڵێت "له‌ راستیدا من له‌ ده‌ره‌وه‌ی پارتی و بوون به‌ ئه‌ندامی پارتی، مرۆڤی هه‌ره‌ داماوی دنیام. که‌سایه‌تی ئاپۆ، له‌ ده‌ره‌وه‌ی بوون به‌ پارت و به‌ بناخه‌وه‌رگرتنی پێوانه‌کانى پارتی، که‌سایه‌تی هه‌ره‌ داماوی دنیایه‌، ته‌نانه‌ت هیچ شتێکه‌. ئه‌و له‌به‌ر ئه‌وه‌ی به‌ که‌میش بێت له‌ رێکخستنیدا سه‌رکه‌وتوو بووه‌ و تا چووه‌ پارتی دامه‌زراندووه‌، هه‌بوونی هه‌یه‌. له‌ هه‌مان کاتدا ئه‌مه‌ به‌سه‌ربردنی که‌سێتییه‌کی کورده‌ و راوه‌ستێنه‌ری مردن و بنه‌بڕبوونێتی و خوڵقێنه‌ری ئومێدی ژیانی نوێیه‌. له‌به‌ر به‌سه‌رخستنی ئه‌مانه‌ که‌سایه‌تی ئاپۆ هه‌یه‌."

 له‌ ده‌رکه‌وتنی سه‌رۆکایه‌تیدا ئه‌مه‌ هه‌یه‌ که‌ به‌رهه‌ڵستی به‌ره‌و دروستکردنی ئه‌لته‌رناتیڤ ده‌با و ره‌تکردنه‌وه‌ش به‌ره‌و چالاکی دروستکردنی ئه‌ڵته‌رناتیڤ پاڵ ده‌نێت. به‌ وته‌ی "نه‌خێر" هاوارکردن و وته‌ی به‌ڵی ده‌رده‌خاته‌ڕوو. گه‌ر ته‌نها هه‌ندێک "نه‌خێر"تان هه‌یه‌ و له‌ به‌رامبه‌ر"نه‌خێر"ه‌کانتاندا "به‌ڵێ"تان به‌ده‌سته‌وه‌ نییه‌، ئه‌وا ئه‌و کاته‌ ئێوه‌ کۆیله‌یه‌کی دڵ به‌گریانن. ئێمه‌ وه‌ک زمانێکی ورته‌ورتکه‌ر به‌کار دێنین و له‌ راستیشدا له‌ شێوه‌ی ورته‌ورته‌که‌ری ئه‌م رۆژگاره‌دا ده‌ژین که‌ ئاماده‌ی رازیبوونه‌ به‌ بوون به‌ کۆیلایه‌تییه‌کی نه‌رمکراو. به‌ڵام به‌رهه‌ڵستی و ره‌تکردنه‌وه‌ ناچاره‌ ئێوه‌ بگه‌یه‌نێته‌ خوڵقاندنی ئه‌ڵته‌رناتیڤی خۆی. تا چه‌ند و چ ئاستێک له‌ هه‌وڵ و ته‌قه‌لا و خوڵقاندنی ئه‌ڵته‌رناتیڤدا بی، ئه‌وه‌نده‌ش ده‌توانی له‌ به‌رهه‌مه‌که‌ی سودمه‌ند بی. گه‌ر نه‌شیخوڵقێنن واتایی و مه‌عنه‌وی ده‌ژین، پشتئه‌ستور به‌ هه‌سته‌کانتان ده‌ژین، پشتئه‌ستور به‌ هێزی فکر و واتا ده‌ژین، به‌ڵام دیسان سه‌رباری هه‌موو شتێک، ناچارن ئه‌ڵته‌رناتیڤ بخوڵقێنن، ئه‌مه‌ش به‌ تاقی ته‌نیا به‌ده‌ست نایه‌ت. خوڵقاندن و دروستکردنی ئه‌ڵته‌رناتیڤ به‌ رێکخراوه‌یی ده‌سته‌به‌ر ده‌کرێت.

له‌ نێو یه‌که‌مین چالاکی سه‌رۆکاتیشدا رێکخستنی هه‌یه‌، ره‌وش و پێگه‌ی دروستکردنی رێکخستنێک هه‌بوو. رێکخستن و ژیانی رێکخراوه‌یی تایبه‌تمه‌ندی هه‌ره‌ به‌رچاوی سه‌رۆکایه‌تییه‌. رێکخراوه‌یی، زانینی ژیانه‌ له‌گه‌ڵ‌ ئه‌و که‌سانه‌ی که‌ گرێدراوی ئامانجێکی هاوبه‌شن، ده‌رخستنی مرۆڤێکی ژیانی نوێیه‌، دۆزینه‌وه‌ی ئه‌و مرۆڤه‌یه‌وه‌ و نیشاندانی توانستی پێکه‌وه‌بوون له‌گه‌ڵیدا. سه‌رۆکایه‌تی به‌ منداڵی یارییه‌کانی له‌گه‌ڵ‌ هاوڕێکانیشیدا ده‌هێنێته‌ سه‌ر زه‌مینه‌ی رێکخراوه‌یی بوون. له‌وێدا رێکخراوه‌یبوونێک هه‌یه‌. له‌و روانگه‌یه‌شه‌وه‌ ده‌شێ بوترێ قۆناخی یه‌که‌م که‌ به‌قۆناخی یه‌که‌مین له‌دایکبوون پێناسه‌ی ده‌که‌ین. له‌ راستیدا ده‌شبێ ته‌واوى ره‌هه‌نده‌کانى ده‌رکه‌وتنی رێکخستنی که‌ له‌ په‌که‌که‌دا خۆی ده‌نوێنێ سه‌رچاوه‌کانی له‌و سه‌رده‌مه‌وه‌ گرتبێت. راستینه‌ی له‌دایکبوونی سه‌رۆکایه‌تی له‌وێدا شاراوه‌یه‌. ته‌واوى تایبه‌تمه‌ندییه‌کانى، له‌و منداڵه‌دا و له‌ هه‌ڵوێست و پێگه‌ی ئه‌و منداڵه‌دا شاراوه‌یه‌. سه‌رۆک ئاپۆ له‌ به‌رامبه‌ر ئه‌م کۆمه‌ڵگایه‌ و ئه‌م دنیایه‌ سه‌ری هه‌ڵداوه‌. تاکه‌که‌سێکه‌  له‌ به‌رامبه‌ر دنیا و سیستمی شارستانی سه‌ری هه‌ڵداوه‌. عه‌بدوڵا ئۆجالان که‌ له‌ ته‌مه‌نی منداڵییه‌وه‌ به‌مشێوه‌یه‌ له‌ به‌رامبه‌ر دنیا سه‌رهه‌ڵده‌دا و ئه‌و ژیانه‌ی که‌ ئه‌وان ده‌سته‌به‌ری ده‌که‌ن ره‌ت ده‌کاته‌وه‌، بۆ خوڵقاندنی ئه‌ڵته‌رناتیڤیشی هێشتا له‌ ته‌مه‌نی منداڵییه‌وه‌ هه‌وڵی تاقیکردنه‌وه‌ی داوه‌ و مرۆڤێکه‌ که‌ تاقیکردنه‌وه‌ سه‌ره‌تاییه‌کانى کۆمه‌ڵایه‌تی و کۆمه‌ڵگای به‌ که‌ره‌سته‌ی یاری و گه‌مه‌کانی ئه‌نجام داوه‌.

هه‌ڵبه‌ته‌ ئه‌مانه‌ چیرۆک نین، به‌ پێچه‌وانه‌وه‌ راستینه‌ی ژیانن، راستینه‌ی رێبه‌ر ئاپۆن، ئه‌و راستیینه‌ی مرۆڤی هه‌ره‌ جوانه‌ که‌ هیچ له‌ پیسییه‌وه‌ نه‌گلاوه‌. عه‌بدوڵا ئۆجالان، خاکی پاک و پێ‌لێ‌نه‌کراو و ده‌ست‌لێنه‌دراومانه‌ که‌ مرۆڤایه‌تی به‌دوایدا وێڵن. ژیانی نوێ له‌م خاکه‌ به‌به‌ره‌که‌ته‌وه‌ ده‌سته‌به‌ر ده‌بێ. ژیان خۆشترین گوزه‌رانی خۆی له‌م خاکه‌دا باڵاده‌ست ده‌کات. چونکه‌ له‌م خاکه‌دا پیس‌نه‌بوون هه‌یه‌، پاک و خاوێنی هه‌یه‌. ئه‌مڕۆ ئه‌م خاکه‌ رووبه‌رێکی به‌رینی قازانج کردووه‌. رێبه‌ر ئاپۆ به‌ رێکخراوه‌یی بوونه‌وه‌ ده‌ست پێده‌کات. بۆ ئه‌وه‌ی بژین ناچارن رێکخراو و رێکخستوو بن. کۆمه‌ڵایه‌تیبوون خودی رێکخستنه‌. کۆمه‌ڵایه‌تیبوون رێکخستووییه‌ک ده‌ستنیشان ده‌کات. په‌رش و بڵاوه‌پێکردنی کۆمه‌ڵگای بێ رێکخراوییه‌. له‌ قۆناخێکی وه‌هادا که‌ له‌ په‌نجه‌ره‌ی ره‌وشی ئه‌مڕۆوه‌ ده‌ڕوانین، ده‌بینین ئه‌وه‌ی که‌ له‌ پاش کورده‌وه‌ ماوه‌ته‌وه‌، ئه‌ندامانی خێزانۆچکه‌کانن. کۆمه‌ڵایه‌تیبوون له‌و نێوه‌دا نییه‌. ناچارین سه‌رله‌نوێ ئه‌مه‌ بنیاد بنێینه‌وه‌. له‌ ده‌رکه‌وتنی خودی بزووتنه‌وه‌که‌مان ئه‌مه‌ هه‌یه‌. ژیان، به‌تایبه‌تى ئه‌و ژیانه‌ی که‌ له‌ قۆناخی چاره‌سه‌ریدا داواکاری بووین، وه‌ک سه‌رۆکایه‌تیش به‌ شێوه‌یه‌کی زۆر روون پێناسه‌ی ده‌کات، خودی کۆمه‌ڵایه‌تیبوونێکی نوێمانه‌. ژیان کۆمه‌ڵایه‌تیبوونی نوێی ئێمه‌یه‌. ئێمه‌ به‌ره‌و بونیادنانى ئه‌مه‌ ده‌ڕۆین. رێکخراوبوونێکی وه‌ها ده‌خوڵقێنین که‌ له‌ مرۆڤی ئازاده‌وه‌ ده‌ست پێده‌کات، تاک ئازاد ده‌کات، زیهنێکی نوێ قازانج ده‌کات و ده‌بێته‌ ئیراده‌یه‌ک. هه‌ست و سۆزه‌کانی دژوار و هۆشیار ده‌که‌ین و رێڕه‌وی راسته‌قینه‌ ده‌ده‌ینه‌ هه‌سته‌کانى و وای لێده‌که‌ین که‌ خۆی بخاته‌ نێو چالاکییه‌کی نوێوه‌ و ده‌یکه‌ینه‌ پاڵپشتێکی بناخه‌یی کۆمه‌ڵگایه‌کی نوێ.

له‌سه‌ر ئه‌م بنه‌مایه‌ش رۆژی له‌دایکبوونی رێبه‌ر ئاپۆ، ئه‌و رۆژه‌ی که‌ پاڵنه‌ر و هانده‌ری سه‌ره‌کییه‌ له‌ پێشکه‌وتن و ده‌رکه‌وتنی سه‌رۆکایه‌تییه‌کی گه‌وره‌یه‌، پاشان خاڵی پاک و خاوێنی سه‌ره‌تای هه‌نگاونان به‌ره‌و چاره‌سه‌رکردنی سیستمێک که‌ ئازادی ته‌واوى مرۆڤایه‌تی ده‌سته‌به‌ر ده‌کات، ئه‌م رۆژه‌ له‌ ته‌واوى مرۆڤایه‌تی و گه‌له‌که‌مان و ژنان و ته‌واوى هاوڕێیانی پیرۆز ده‌که‌ین. هه‌ر له‌م چاوگه‌شه‌وه‌ سه‌رکه‌وتن ده‌بێته‌ سه‌رکه‌وتنی گه‌لی کورد و ئه‌و گه‌لانه‌ی که‌ له‌ پێناو ئازادی و سه‌ربه‌خۆییدا تێده‌کۆشن و شه‌ڕ ده‌که‌ن.

 

 

"کێشه‌ى من له‌گه‌ڵ لیبراڵیزم کێشه‌یه‌کى مه‌بده‌ئیه‌"

لۆژیکێکى دیاریکراوه‌ سه‌راپا له‌نێو چوارچێوه‌ى سه‌رمایه‌دارى ئه‌مڕۆدا، له‌ پێناو دووباره‌ داڕشتنه‌وه‌ى خۆی و بۆ کارکردن له‌نێو بارودۆخى کۆمه‌ڵگاى به‌کاربه‌ریى ئه‌مڕۆدا...

مێژووى کاکه‌ییه‌کان؛ ئایین و باوه‌ڕى یارسان (1)

دیارده‌ى فره‌ژنى و ژن‌به‌ژن و گه‌وره‌ به‌ بچوک و به‌زۆر به‌شودان له‌ناو شوێنکه‌وتوانى ئه‌م ئایینه‌دا نیه‌ و نه‌بووه‌...

رێبه‌ر ئاپۆ بووژێنه‌ری هه‌ست و تێگه‌ (1)

سه‌رۆکایه‌تی رێڕه‌ودان و پاڵدانی هه‌سته‌کانی، به‌ره‌و فکر و هزری تایبه‌ت به‌ خۆی بردووه‌...

2017 © Partiya Karkerên Kurdistan (PKK)
[email protected]