19.11.2017

شەڕی باشووری كوردستان، تەنیا لەدژی بەكرێگیراوی و خیانەت نەبوو، شەڕی

كۆنگرەی نەتەوەیی بێ گومان دەبێتە هەنگاوێكی زۆر گرنگ كە كورد لەمێژووی خۆیدا بۆ جاری یەكەم هەڵدەسن بە بونیادنانی بەڕێوەبەرایەتی بۆ خۆیان، بەتایبەتی ئاستێك كه‌ بتوانن كۆتایی بە پۆلیتیكا سەخت و ناهەموواری "پەرتكە و زاڵبە" بێنن...

 

 

گوڵبژێرێك له‌ ئارشیڤی بیقاع

سەرحەد بوجاك،: سەرۆكی بەڕێزم: لەم قۆناخەدا ئێوە لە 1983 له‌گه‌ڵ "پ.د.ك" و لە 1988 دا له‌گه‌ڵ "ی.ن.ك" دا پرۆتۆكۆڵتان ئەنجامدا، "پ.د.ك / ی.ن.ك" بەردەوام باسی ئەوە دەكەن گوایە "PKK" رەچاوی ئەو پرۆتۆكۆڵانەی نەكردووە، دەتوانن لەم مژارەدا روونكردنەوەیەك بده‌ن ؟

"رێبەر ئاپۆ": بێ گومان. لە رەوشێكی هەم شەڕاوی و هەم بەپەیوەندیدان، هێزەكانمان لە كەمپەكانی باشووری كوردستاندا جێگیربوون، بەتایبەتیش لەسەر رێكەوتنێكی دیاریكراو، هەروەها لەسەر سنوورەكانی باشووری كوردستانیشدا هێزمان هەیە. دۆخی پێكدادانێكی گەرم لە ئارادا نییە، حاڵی حازر لەنێو ئەنجامەكانی دۆخی ئاگربەستداین. لەسەرەتای هەشتاكانەوە درێژەمان بە دانوستاندنەكانمان له‌گه‌ڵ "پ.د.ك / ی.ن.ك" داوە، رێكەوتنمان لەگەڵ "ی.ن.ك" دا لە سەرەتای هەشتاكانەوەیە، هەروەها لەگەڵ "پ.د.ك" دا لە 1982 دایە، لەگەڵ هەر دوو لایەنیشدا پرۆتۆكۆڵمان ئیمزاكرد، دەقی پرۆتۆكۆڵەكەمان لەلایە، چ لە چاپكراوەكانی "سەرخۆبوون" دا و چ لە پەرتووكێكمان بەناوی" خیانەتی بەكرێگیراوی و بەرخۆدانی شۆڕشگێڕانە لە كوردستاندا" دەقی پرۆتۆكۆڵەكان بڵاوكراونەتەوە، دەتوانن وەریبگرن و بییانخوێننەوە. لەلایەنی ناوەڕۆكیشەوە هەنگاوێكە بەهیچ شێوەیەك شایانی بەرهەڵستكردن نییە. لەگەڵ ئەمەشدا ئێمە بەندین بەم پرۆتۆكۆڵانەوە. وەكو سەرنجمان بۆ راكێشا؛ رووبەڕووبوونەوە و راوەستان لەدژی ئیمپریالیزمی ئەوروپا و پەیوەندییە داگیركارانەكەی ئەمریكا لە ئارادایە. بەشێویەكی هاوسەنگانە برەودان بە تێكۆشانی چەكداری لە ئارادایە، ماددەگەلێك لەسەر برایانە پێشخستنی پەیوەندییەكان هەیە، ئەگەر هێز لە داگیركاریی توركیا وەرنەگرن، ناژین. ئاشكرایە كە، لە رۆژی ئەمڕۆماندا بە پاڕانەوەوە لەنێو بەكرێگیراویدا هەڵدەسووڕێن. پێویستە ئەمانە روون بكەنەوە. ئەوانە لەبەر ئەوەی بێ پاڵدانەوە بە بەغدا و توركیا و ئێرانەوە ناتوانن سەربەخۆ لەسەر پێ رابووەستن، ناكەونە نێو هەڵوێستی سەربەخۆخوازی و ئازادیخوازانەوە. باشە بۆچی ئێستاكە هەندێك نایانەوێ لەم مەسەلەیە بگەن ؟ زۆر ئاشكرایە لەمانەدا پشت بە هێزی خۆیی و گەوهەرییانە بەستن و كەوتنە سەر رێڕەوی سەربەخۆیی و تەنانەت خۆ ئامادەكردن بۆ ئەمە بوونی نییە. تا پێداویستییەكانی ئەمە جێبەجێ نەكەن ناتوانن تاكە رۆژێكیش لەسەر بناخەی سەربەخۆیی و ئازادی لەسەر پێ رابووەستن. جگە لەوەی كە نابنە دژبەری ئەمپریالیستی و دژە داگیركاری، بەپێچەوانەوە ئەگەر لەگەڵ مەترسیدارترین هێزی ئەمپریالیستی و داگیركاریدا لە پەیوەندیدا نەبن، خۆیان لە دۆخێكی كەوتوو و رێنەبڕدا دەبینن.

 لەكاتێكدا كە رەوشەكە ئاوەهایە و سەرباری ئەوەش ئەگەر هێشتا بڵێن ؛ "PKK" رەچاوی پرۆتۆكۆڵەكان ناكات، پێویستییەكانی رێكەوتنەكان جێبەجێ ناكات، ئەمە خۆی لە خۆیدا پشتگوێخستنی راستییەكانە. با بێن پێكەوە و لەژێر چەرداخێكی هاوبەشدا لە دژی داگیركاری، لەپێناو دیموكراسی، لە دژی ئەمپریالیزم تێبكۆشین، جا ئەمە بەرەیەكی نەتەوەیی دەبێت، سوپا و لەشكەری نەتەوەیی دەبێت و لەژێر فەرمان و فەرماندارێتی ئەوەدا بەڕێوەی ببەین. من لە هەشتاكاندا نەك بە تەنیا بە كەمال بورقای، بەڵكو بەهەموویانم گوت، بە تاڵەبانی و بە بەرزانیشم گوت"ئێوە هەر سەركردەبن، پێكەوە لەپێناو كوردستانی گەورەدا شۆڕش بكەین، هەتا كوردستان بەڕووی شۆڕشدا نەكەینەوە، ئێوە لە باشووردا بوونتان نابێت". هەموویان پەسەندیان دەكرد، راستییەكەیشی وەهابوو. بە بورقایشم گوت" ئێوە سەركردەبن، بەڵام دەست لە دێهاتی و كرێكاری كوردستان بەردەن، ئێمە رایانپەڕێنین، با دیبلۆماسی هی تۆ بێت، بازرگانی و دانوستان هی تۆ بێت، با قوورسترین كاری لە ئەستۆی ئێمەدا بێت. با كوردە دێهاتییەكە، كرێكارەكە بە ئەندازەیەك بەرخۆی بدات، من رێكسختنی دەكەم و شەڕی پێ دەكەم، تۆش زمانحاڵی بە"، لەوە زیاتر چیان لەمن دەوێت، هەمان شتم بە بەرزانی و تاڵەبانیش گوت.

بەرزانی و تاڵەبانی گوتیان (ئەوروپا داوامان لێدەكات كە تێكۆشانی چەكداری بە كاری تیرۆریستی رابگەیەنین، نازانم ئەمریكا داوای چیترمان لێدەكات، پەیوەندیمان له‌گه‌ڵ توركیا بەست، ئەوانیش دەڵێن هاوكاری و پشتیوانیتان دەكەین، بەڵام بەمەرجێ لەدژی "PKK" دەربكەون، بەمەرجێك پێیان بڵێن تیرۆریستن، ئەگەر لەم بوارەدا هاودەستمان بن و بەهەموو شێوەیەك هاوكاریمان بكەن، بەهەموو شێوەیەك پشتیوانیتان دەكەین).

ئێوەش ئاگادارن مەسعود بەرزانی دەڵێت" ئێمە تەحەمولی برسێتیمان نییە، ئەگەر ئازوقە نەیەت، نابێت. لەبەر گەلەكەمان تێكۆشان بۆ چەند ساڵێك دوابخەن". من هێزی دواخستنی تێكۆشانم نییە. ئەمە هەنگاوێكی گەورەیە كە گەلەكەمان بە هەوڵ و تەقەلایەكی زۆر گەورە و بۆ جاری یەكەمە پێی گەیشتووە. گەورەترین خراپەكارییەك كە بیكەین، راوەستاندنی تێكۆشانە. گەلی كورد وەك مامۆستا ئیسماعیل"بێشكچی"یش ئاماژەی پێدەكات، یەكەمین فیشەكی تەقاندووە، ئەمە واتایەكی زۆر مێژووییانەی هەیە، با هەموو شتێك بچێت بەڵام ئەم هەنگاوە پتەو و دروست بێت. داوای هەموو شتێكم لێبكەن، بەڵام بە هەڵوێستێكی وا هەڵمەستن كە خزمەت بەم هەنگاوە نەكات. زۆر تكام لێكردن، بەداخەوە دوژمنیش داوای پاشگەزبوونەوەمانی لە گەورترین هەنگاوماندا دەكرد. ئەمەی بەسەر ئەوانیش "واتا بەرزانی و تاڵەبانی"دا سەپاند و ئەوانیش سەریان لەبەردا نەواند. ئێمە پابەندی هەنگاوی 15 ی ئاب و سەرجەم ئامانجەكانی ساڵانی دواتریش بوین. سەرئەنجام، ئەمە بووە مایەی ناكۆكی لەگەل ئەوان، رەچاوكردنی پرۆتۆكۆڵ لەلایەك، بێ پابەندبوون بە پێوانە بناخەییەكانی نیشتمانپەروەری و دیموكراتییەوە، بە دانیشتنەكانیان له‌گه‌ڵ ئەنقەرە و بە دانیشتنەكانیان له‌گه‌ڵ ئەوروپا بوونە خاوەنی هەڵوێستێك كە تەنانەت لەبەرەدا بكەونە شەڕ لەبەرامبەر بە ئێمە. ئێوەش باش دەزانن كە

لەشەڕی باشووردا و بەجۆرێك كە گەلەكەمان بڕوا بەچاوی خۆی نەكات، كەوتنە پێش تانكەكانی توركەوە و قۆڵبەقۆڵ و باوەش بە باوەش له‌گه‌ڵ جەنەڕاڵەكانی شەڕی تایبەتی تورك، هاوكارییان لە كوشتنی كوڕ و كچە لاوەكانماندا كرد. ئازووقەكانیان تاڵانكردن، بەڕادەیەك ئەگەر لەدەستیان بهاتبایە بازرگانیان لەسەر ئەسیرەكان دەكرد و دەیان فرۆشتن، تەنانەت كردیشیان.

من خۆم ژێرباری دووبارەكردنەوەی یادەوەری ئەو هەڤاڵە تازە هاتووە دەبینم، داستانی كچێكە كە لە دێرسیمەوە هاتووە. ئەم هەڤاڵە لە بەسەرداگرتنەكەی قەرەقۆڵ"بازگە"ی رووبارۆكدا ئەركی فەرماندەی تاقمە. لە باشوور شەڕ دەستپێدەكات، لەوێش ئەركدارە و بەرپرسیارێتی هەیە و لەسەر تاقمە، لەشەڕەكەدا بریندار دەبێت، تا دوا فیشەكی شەڕ دەكات، هێزەكانی باشوور پێی دەڵێین تەسلیم ببێت، ئەو دەڵێت "نا". پێیان دەڵێت "ئێوە هاوكاری و یەكدەستیتان له‌گه‌ڵ دوژمن كرد، بە پشتبەستن بە باشوور، لەباشوورەوە هێرشی باكور دەكەن، بەهیچ شێوەیەك خۆم تەسلیمی ئێوە ناكەم". بێگومان وابزانم ئەوانە لەسەر بناخەیەكی سۆزمەندانە پێی دەڵێن" ئێمە هیچت لێ ناكەین" و گەرانتی دەدەنێ، دەڵێ"من تەسلیمی ئێوە نابم و بە خیانەتكارتان دەبینم" و خۆی لە كەندەڵانێكی بەرزەوە فڕێدەداتە خوارەوە. ئەمە كاریگەرییەكی گەورەش لەوان دەكات و هێشتاش گەلی باشووری كوردستان ئەم رووداوە گفتوگۆ دەكات، لەكاریگەری ئەم رووداوە رزگاریان نابێت، چونكە وەڵامی وا جوان و بەجێی خیانەت و بەكرێگیراوی دەداتەوە، هەروەها رووداوێكی دیكەشم بیست. لاوێك بەناوی حسێن چەلەبی، باوكی بۆ "ك ئو م" هەڵبژێردرا. كوڕە تاقانەیەتی، ئەمیش لە قەڵای شەعبان فەرماندەی تاقمە. زۆر تەنگاسی دەكەن و داوای تەسلیمبوونی لێ دەكەن، هەڤاڵا بریندارە و لە قەڵاكەوە فڕێی دەدەنە خوارەوە. باوكی گوتوویەتی"من بەساڵان پروپاگەندم لەبەرژەوەندیان كرد، دوابەدوای تێكچوونەكەی 1975 دەستی كوڕەكەمم گرت و بەشداریمان لە رێپێوانی شەرمەزاركردنەكان دەكرد". ئێمە ئێستاكە دەمانەوێ ئەم خیانەتە مێژووییە راوەستێنین، ئەم شەڕە لەو پێناوەدایە.  ئێمە چووینە لایان تا سازش بكەین و پێمان گوتن" بەسە هێندە له‌گه‌ڵ دوژمن نەكەونە پەیوەندی وەها قووڵەوە، ئەمە نە بۆ ئێوە و نە بۆ گەلی كوردستان بەهیچ شێوەیەك سوودی نابێت" و بەڕاستیش شەڕی باشوور بۆ ئێمە یەكێك بوو لەو شەڕە تایبەتییانە.

بۆ كۆتاییهێنان بەم مێژووی خیانەتە، بۆ كۆتایی هێنان بە هاوپەیمانی – بەكرێگیراوییەكی وەها لەبەرامبەر ئەو هەموو گەلە، لەبەرامبەر ئەم وڵاتە ئەم شەڕەمان گرتە بەرچاو. من پێتان بڵێم، ئەنجامی ئەم شەڕە زۆر ئەرێنی دەبێت. لەپێناو پاكتاوكردنی هاوپەیمانێتی و بەكرێگیراوی دوژمن و لەپێناو رزگاركردنی ئەوانەی بەڕادەیەك نیشتمانپەروەرییان تێدا ماوە لەناو رێكخستنە گەورەكانی باشووری كوردستان، ناچاربووین شەڕ بكەین. با ئەوەشتان پێ بڵێم "BBC" لێی پرسیم "ئێوە هەم بەمانە دەڵێن خاین و هەم دانیشتنیان له‌گه‌ڵ ساز دەكەن، ئەمە ناكۆكی نییە ؟ " نەخێر، ناكۆكی نییە. بۆ كۆتایی هێنان بە خیانەت بە هێندەی شەڕ و پێكدادانەكان، پێویست بە پەیوەندی بەستنیش هەیە. ئێمە ئەم هۆشمەندییەمان نیشاندا. لە شەڕی باشووردا كەوتبوونە شەڕی سەنگەر بە سەنگەرەوە، هێزەكانیان بەرەو رەوشی لەنێوبردنەوە دەبرد"مەبەست لە شەڕەكانی ناوخۆیە"، بۆ ئەوەی رێگە بۆ لەنێوبردن خۆش نەكرێ، هەڤاڵان لەوێ كەوتبوونە سازشەوە، ئێمەش شیاومان بینی، ئەمە بووە هەنگاوێك لەسەر بناخەی ئەم هەنگاوە شەڕ راوەستێنرا و هێشتا دانوستانەكان درێژەیان هەیە. لەم واتایەدا هەوڵی جێبەجێكردنی پێویستییەكانی پرۆتۆكۆڵەكان دەدرێ. واتا جارێكی دیكە ئەو پرەنسیپ و تایبەتییانە دەكەونە رۆژەڤەوە كە لە رێكەوتنەكانی 1980 دا بڕیارمان لەسەر دابوون. لەماوەیەكی نزیكدا راستەوخۆ له‌گه‌ڵ جەلال تاڵەبانی دادەنیشین، ئەگەرێكی گەورەی دانیشتنم له‌گه‌ڵ مەسعود بەرزانیش هەیە، بێ گومان هەندێك لە یەكینەكانمان دانیشتن ساز دەكەن، ئێمە جارێكی دیكە بانگیان لێدەكەین كەوا پابەند بن بە پرەنسیپەكانی رێكەوتنەكەوە.

بەشێوەیەكی زۆر بەرفراوان، هەوڵی روونكردنەوە و راگەیاندنی كێشەی مێژووی تێكۆشانێك دەدەین كە نزیكەی 30 سی ساڵە بەردەوامە. بەگشتی بەكرێگیراوی، تەسلیمییەت، خیانەت لەمێژووەكەماندا وێنەی زۆرە، بەتایبەتی لەم سی ساڵەی دوواییدا بەشێوەیەكی زۆر بەرفراوانترە. دەمانەوێ كۆتایی بەم مێژووە نەرێنییە بێنین. وەك بە چەقۆیەك بیبڕین، دەمانەوێ ئەم لایەنە نەرێنییەی مێژووی گەلەكەمان "كە شەڕی باشووریش بخەینە شوێنی نەشتەرگەرییەك یان ئۆپەراسیۆنێك" بەشێوەیەك كە جارێكی دیكە نەبێتە موساڵاتێك بەسەرمانەوە، ناچاربووین گەلێك فیداكاری زۆر گەورەتر ئەنجام بدەین تا بژین. هیواخوازم هەندێك كەس هۆشیان بەخۆیاندا هاتبێتەوە، ئێمە ئەم شەڕەمان بۆ ئەوە لەبەرچاو گرت كە بكرێتە هۆیەك نەبێتە ئامرازێك بۆ بەرژەوەندییە كەسایەتی و خێزانی و بنەماڵەییەكان، بەشێوەیەكی زۆر قارەمانانەش بەڕێوەمان برد. ئەم شەڕە تەنیا شەڕی (PKK ـ پ.د.ك ـ ی.ن.ك) نەبوو؛ شەڕی "PKK" بوو له‌گه‌ڵ دنیا. ساڵێك بەر لەو شەڕە هاوپەیمانییەكی میللی سازدرا، هێزە بەكرێگیراوەكان بەتایبەتی لە ئەوروپا و ئەمریكا شانبەشانی پۆلیتیكای دەرەكی توركیا جوڵانەوە، تا كۆتا مۆركی تیرۆریستیان لەسەر "PKK" دادەنا، هاوكاری لەوانەش وەرگیرا. واتا لە ناوەوە و لە دەرەوە هەموو دنیا بە ئامانجی لەناوبردنی "PKK" تا كۆتایی 1992 رێكەوتن. لە كۆتاییەكانی ساڵی 1991 دا تاڵەبانی لە نامەیەكیدا وای پێدەگوتین" یەكێك لە هێڵە سوورەكان كێشراوە، ئەوەكەی دیكە لەماوەی هەفتەیەكدا دەكشێتەوە، بۆ ئەوەی تەنیا له‌گه‌ڵ مێژوو رووبەڕوو نەمێننەوە، وەرن واز لەم تێكۆشانی چەكدارییە بێنن، لە ئەنقەرە پێكەوە بەدەوری مێزێكدا لێك وەرن".

پێشتریش باسم كردبوو، ئەمە گوشارێك بوو بۆ تەسلیمبوون. ئێمەش پێمان گوتن "ئەوەی ئێوە دەیڵێن رێگەی تێناچێت، گەر تەواوی دونیاش دەركەونە بەرامبەرمان، دووەمین هێڵی سووریش بكشێتەوە، ساڵی 1992 دەكەینە ساڵی بەرخۆدانییەكی زۆر گەورە". ئامادەكارییەكی گەورەمان كرد، ناچاربووم زیاتر بەسەر هەر یەكێك لە بەرەكاندا بچم. بێگومان هەڤاڵانم وەك دەمویست شەڕیان نەكرد، بەڵام لەهەموو بەرەكاندا بەرخۆدانی لایەنی لەپێشینە و قورستر بوو. ئەگەر ببێتە مایەی هەزاران شەهیدیش، ئێمە ناچاربووین ئەم گەورەترین هەڵمەتی پاكتاو و گەلەكۆمەیەی بەسەر مێژووی كوردستاندا دەسەپێنرێ پووچەڵ بكەینەوە. ئەوە سەپاندنێكی زۆر گەورەبوو. هەموو دنیای لە پشتەوەبوو و بەڕاستیش بەڕواڵەت "PKK" پاكتاو دەكرا، بەڵام لەگەوهەردا هەر چییەكی بەنامووس و بەشەرەف لە كوردستان بوایە لەنێویان دەبرد. با خۆمان نەخەڵەتێنین، ئەو رۆژەی دەستیان بەشەڕكرد لەدژی ئێمە، دەوڵەتی فیدراڵی كورد راگەیەندرا، ئەوەش بەسایەی بۆماوە و میراتی ئێمەوەبوو، ئەگەر ئێمە بدۆڕاینایە، دەوڵەتی فیدراڵی نەدەما، تێكڕای ئەمانە ئاڕاستەی بەرزانی و تاڵەبانی دەكەم و دەڵێم؛-  ئەوانیش دەڵێن "راستیت"، وا دەبینن سێ دەوڵەت یەكیان گرت، با ئێمەش یەك بگرین، توركیا لەژێرەوە له‌گه‌ڵ سەددام سازش دەكات، با ئێمەش سازش بكەین. ئەوروپا هیچ بە گەرمی لە داواكانمان ناڕوانێ و هاوكاری ناكات. پێویستە كوردان هاوكاری یەكتربن، پێشتر ئەقڵتان لەكوێ بوو ؟. من جارێكی دیكە بە هەڵوێستێكی گەورە و گرنگەوە ئەم وەڵامەم دانەوە "ئێوە تاوانی گەورە ئەنجام دەدەن، بێگومان دەشێ ئێمەش كەموكورتی گەورەمان هەبێت، بەڵام ئەوەی ئێمە كەمووكورتییە، ئەوەی ئێوە تاوانە و تاوانێكی گەورەیە". لەگەلێك لە قسە و لێدوانەكانمدا گوتبووم "چەندە لەنێو هەڵوێستی بەكرێگیراوی و خائینانەشدابن، ئەگەر واز لەو هەڵوێستانەیان بهێنن، ئامادە و كراوەین بۆ رێكەوتن و تەنانەت چەندین جار پێشم گوتن كەوا دانوستان و دانیشتنەكانی ئێستاكەش لەهەمان چوارچێوەدا پەسەند دەكرێت. جارێكی دیكە دەبینم كەوا دێینەوە سەر هەمان خاڵ و شوێن. ئێمەش سەلماندمان كەوا پێویست بوو دەزانین هەموو دونیا بهێنینە بەرامبەرمان و لەبەرخۆمان بدەین، بوێری بەرخۆدانیمان هەیە و بزاوتێكی سەركەوتووین. كاتێ ئەم هێزانە جارێكی تر هەڵوێستی راستیان بەهەند وەرگرت، هاتنە سەر هەڵوێستی شیاو بە بەرژەوەندییەكانی گەل، ئەگەر لەكاتێكیشدا بێت كە هیچ پێویستیشمان پێ نەبێت و ئەگەر دەستكەوت و قازانجی گەلی تێدا بێت، بە بڕوای بە رێگەی بەرەو یەكێتی بوون و بەرخۆدانیەوە، بەهیچ شێوەیەك خۆمان لە دانیشتن و تەنانەت لە رێكەوتن بەدوور ناگرین. وەك بە جاران رامانگەیاند ئێمە لەنێوخۆی كوردستاندا نەك تەنیا له‌گه‌ڵ كەسایەتی یان گرووپ و دەستە و یاخود پارتەكان، بەڵكو له‌گه‌ڵ نوێنەرانی گەلی توركیاش و له‌گه‌ڵ هێزە جیاجیاكانی رۆژهەڵاتی ناویندا رێگەوتن دەكەین. بەلای ئێمەوە مەسەلە مەسەلەی پرەنسیپە، هەمیشە بەپێی هەل و توانست هەوڵی جێبەجێكردنی پێویستییەكان دراوە.

ئایا ئەم دانیشتنی رێكەوتنانە بە ئەنجامی نوێ و گرنگ دەگات ؟ خەیاڵپەرست نین، راستییە مێژووییەكان پشتگوێ ناخەین، ئەو بەرژەوەندییە ئۆبژێكتیفە چینی، كۆمەڵایەتی و كەسایەتییانە دێنینە بەرچاو، بەڵام سەرباری ئەمەش لەو بڕوایەداین كە هەندێ هەنگاوی ئەرێنیش بنرێن. له‌گه‌ڵ ئەمەشدا تەحەدای نیازپاكی خۆشمانین، ئێمە بەهیچ شێوەیەك ناكۆكی و ترازانە نەتەوەییەكان بە شەڕی خوێناوی ناگەیەنین، پاشڤەڕۆیی و سەرەتاییەتی وەها لای ئێمە جێگای نییە، پاشڤەڕۆیی و سەرەتاییەتی سووربوونە لەسەر شەڕی خوێناوی، بەپێی بارودۆخ و پێویستی، دانیشتن له‌گه‌ڵ ئەوانەدا كە شەڕمان لەگەڵدا كردوون، راستینەیەكی تێكۆشانمانە. چەندە له‌گه‌ڵ ئەمانە دژوارانە شەڕمان كردووە، هێندەش بە ئامانجێكی شیاو بە گەل، ئامادەی دانیشتنین بۆ رێكەوتن. ئەمە لە شەڕیشدا وایە و لە ئاشتیشدا. گرنگ ئەوەیە سازش و رێكەوتن لەخزمەتی تێكۆشانی دۆزی سەربەخۆیی و ئازادی گەلدا بێت. گەر سوود بە یەكێتی گەلەكەمان بگەیەنێت دادەنیشین. با هیچ كەسێك ئەمە بە ناكۆك نەبینێ، بەپێچەوانەوە دەتوانن ئەمە بە "بەردەوامیدان بە پۆلیتیكای راست، بە تەكتیكی راست" لێكیبدەنەوە. هەندێك ئەم هەنگاوانە بە شێوەی نیازخراپ و دوور لە ئاسۆی پۆلیتیكی رەخنە دەكەن، دەڵێن، مرۆڤ هیچ له‌گه‌ڵ ئەو هێزە دادەنیشێت كە تادوێنێ شەڕی له‌گه‌ڵ كردووە. ئێمە پێشتریش دانیشتینمان ئەنجامدابوو، بەشێوەی چڕوپڕ. شەڕمان كرد، دیسانەوە دادەنیشین، سبەی رۆژ دوورنییە جارێكی تر شەڕیش بكەینەوە، هەموو شتێك لەپێناو سەركەوتنی پۆلیتیكای شۆڕشگێڕیدایە. گوتنی هەمیشە شەڕ، چەندە هەڵەیە؛ ئەگەر بشڵێین با هیچ سازش نەكەین، هیچ رێنەكەوین - یش هێندە هەڵەیە. هەمیشە بگوترێ شەڕ و هەمیشە شەڕ بكرێ، بەرەو گۆشەگیری و لەنێوچوون دەچێ، بەهەمان شێوە گەر بگوترێ هەمیشە ئاشتی، هەمیشە سازش و با ناكۆكی نەكەوێتە ناومانەوە، ئەمەش بەرەو تەسلیمییەت و لەنێو بردنەوە دەمانبات. بەدرێژایی مێژووی تێكۆشانمان، زۆر بەوردری رەچاوی نەكەوتنە نێو ئەو دوو چەوتییەوەمان كرد، گەلەكەشمان دان بەوەدا دەنێ كە ئەمە هەڵوێستێكە لە بەرژەوەندی و سوودی گەلی كوردستاندایە و بەهایەكی زۆری پێدەدات. لەسەر ئەم بناخەیە لە ئێستا بەدواوە و بۆ داهاتووش زۆر بەهیوام، بەهیوابوونم هۆكاری تایبەتی هەیە، بەتایبەتی بە قۆناخێكی بەرزتر گەیشتنی خەبات و تێكۆشان لە باكوری كوردستان و بەڕادەی دەستەبەركردنی ئازادی، هەروەها دەرخستنی واتای خۆ تاكە ناوەند بینینی هێزەكانی باشووری  كوردستان، لەدواوە مانەوەی قۆناخی لە زنجیردانی سەرتاپای كوردستان لەلایەن بارودۆخە نێو دەوڵەتی و هەرێمییەكان، لەلایەكی تریشەوە ئاستی پێكهاتەكانی باشووری كوردستان لە بارودۆخی گونجاودا دەشێ بەرەو رێكەوتنمانەوە ببات. چەند ساڵی پێشتر ئەم دەرفەتانە نەبوون، ئەم دەرفەتانە چەند ساڵێكە لە گەشەكردندان. لەلایەكی ترەوە پەیوەندی و رێكەوتنەكانی ساڵانی رابردوو جگەلەوەی كە ئەمڕۆ نابێتە وەڵامێك بۆ قۆناخ لەهەمانكاتدا بێ واتایشە. لە قۆناخی ئێستاكەدا بینینی چۆنێتی دەستەبەركردنی رێكەوتنی نوێ و بەم پێیەش ئامادەكردنی رێكەوتن رەوشێكی نوێ و لەجێ و پێویستە. هەموو ئەم رەوشە دەبینین. هەم دەرخستنی زەمینەی ئەم رەوشە نوێیەی بە خەبات و تێكۆشان ئامادەمان كرد و ئەم رەوشەمان هێنایە كایەوە، هەم گەیاندنی ئەمانە بە رێكەوتنی پێویست، بە سەركەوتنی گرنگ دەنرخێنین.

ئەم گۆڕانكاری و پێشكەوتن و هەروەها گفتوگۆیانە دەبن و درێژەیان دەبێت، سەرلەنوێ هێندەی دەستنیشانكردنی هەندێ پرەنسیپ، هەڵوێستی تەكتیكی دەستنیشان دەكرێن. بەگشتی گرنگی دەدەین بە هەموو یەكێتییەكی تەسك و بەرفراوانی سەرجەم هێزە نەتەوەییەكان، نیشتمانپەروەران، دیموكراتان. نەك بەتەنیا كەسایەتی و دەستە و گرووپە رادیكاڵەكان، قازانجكردنی گرنگترین دیموكراتەكان و ئەو كەسایەتییانەی لایەنی نەتەوەییان هەیە. له‌گه‌ڵ ئەوەی كە دەمانەوێ ئەمە لە شێوەی لە ئاستێكی بەرزدا دەزگایەك، یاخود لەچوارچێوەی كۆنگرەیەكی نەتەوەییدا بەرجەستە بكەین، بە نوێكردنەوەی بەرەی هەر یەكێك لە پارچەكان لەچوارچێوەی تایبەتی خۆیدا هەوڵ دەدەین تا لەسەرتاسەری كوردستاندا جێبەجێی بكەین. بەتایبەتی لە باكوری كوردستاندا گرنگی بەرەیەكی بەرفراوانتری رزگاری نەتەوەیی دەركەوتۆتە پێش. لەسەر ئەمە رادەوەستین. هێندەی پەیوەندی نێوان سۆسیالیستەكان، روونكردنەوە لەمەڕ جۆری پەیوەندی و پشتیوانیكردنی نیشتمانپەروەرە دیموكراتەكانیش دەكەین. هەمان شت بۆ بەڕێوەبەرایەتییە پێشكەوتووەكانی هەرێمەكە و هێزەكانی ناوچەكەش گونجاوە و لەجێی خۆیدایە، بۆ پەرەدان بە پەیوەندی و هاوكاری له‌گه‌ڵ ئەمانەدا هەوڵ و تەقەلا دەدەین. تێكڕای ئەمانە لە كاروبارە بەرنامەڕێژكراوەكانی 1993 جێگەیەكی گرنگ دەگرێت و وابزانم هەل و توانست بۆ هەنگاوی سەركەوتووانەتریش دەڕەخسێنێت. بەتایبەتی تێكۆشانی گەشەسەندوو لە هەموو كاتێك زیاتر هەل و توانست بە رێكەوتنی شۆڕشگێڕی – نیشتمانپەروەرییانە دەدات. پێشەنگایەتی "PKK" كە خودی خۆی ئەمەی بە هەوڵ و خەباتێكی گەورە ئامادەكردووە، بێگومان هەر خۆیشی دەزانێ بە باشترین شێوە ئەنجامەكانی هەڵبسەنگێنێت.

سەرحەد بوجاك: سەرۆكی بەڕێزم، مەبەستتان لە بەرەی بەرفراوان و پێشكەوتووی نەتەوەیی، واتا ئەوە بەرەیەی لەنێوان "PKK" و ئەو هێزانەدایە كە دەڵێن "ئێمەش ئامادەین"؟ یاخود بەرەی خۆیی گەلە ؟. "PKK" بەرەیەكی هەیە، "ERNK"، دەتانەوێ جگە لەمە بەرەیەك دامەزرێنن یاخود لەسەر بناخەی "ERNK"؟.

رێبەر ئاپۆ: هەردوو واتاكەش دەگرێتەوە، هەم گەل، واتا پەرە بە رێكەوتن و بەرەی نەریتی رەنجدەران دەدەین، هەم برەو بە یەكێتی و پێكەوەبوونی رێكخستنە جیاجیا و پارتەكان دەدەین. هەردوو كار و خەباتەكەش هەنووكەیین و هیچ ناكۆك و پێچەوانەییەكیشیان له‌گه‌ڵ یەك نابێت و یەكتر تەواو دەكەن، لەهەمانكاتدا هەل و توانستی پێكهێنانی هەردووكیشیان هەیە. هەر لە ئێستاوە هەندێك رێكخستن دەیانەوێ لەژێر بانی "ERNK" دا لەچوارچێوەی تێكۆشانی رزگاری نەتەوەییدا بجووڵێنەوە. ئێمە له‌گه‌ڵ ئەمانەدا هەڵوێستمان گرنگ و ئەرێنی دەبێت. بێگومان بەرەی گەل لە بناخەدا لەنێو پێشكەوتن و هەنگاوێكی گەورەدایە. ئەوە بەتایبەتی بە رێكخستن دەگەیەنین و گرنگترینیشی هەوڵ دەدەین تەكتیكی سەرهەڵدان له‌گه‌ڵ یەكینەكانی بەرگری – گەوهەری گەل دا پتەوتر بكەین. تێكۆشانی نەتەوەیی نەك تەنیا بۆ باكوری كوردستان، هەوڵ دەدەین تا له‌گه‌ڵ هێزەكانی باشووری كوردستانیش برەوی پێبدەین، واتادارترین زانیاری گۆڕینەوە و پەیوەندی و گرێدان بخوڵقێنین و بیهێنینە كایەوە. لەم بوارەدا كۆنگرەی نەتەوەی دەتوانێ واتای بانێكی گەورە بگەیەنێت. حاڵی حازر هەر چەندە كۆنگرەی نەتەوەیی  لەڕووی سەرتاسەری كوردستانەوە هەنگاوێكی نوێ بێت، بەڵام لەو بڕوایەدام كە بەشێوەیەك واتادارە كە هیچ بچووك نەكرێ و نەبینرێ توانست و هەل و دەرفەتی بە سەركەوتوویی جێبەجێكردنیمان پێدەدات. بەپێویستی دەزانم تۆزێك بەرفراوانتر لەسەر راستینەی كۆنگرەی نەتەوەیی رابووەستم، لەجێی خۆیدایە بۆ كۆنگرەی نەتەوەیی بەتایبەتی پێكهاتەكەی، چوارچێوەی سیاسیی، ئەركە چاوەڕوانكراوەكان و لەو لایەنەوە پێویستییەكانی دیكە بكرێنە مژاری گفتوگۆ و لێكدانەوەوە. وابزانم ئێوە ئێستاكە لەم بارەیەوە هەندێ ئەرك رووبەڕووتان بۆتەوە. ئێمە وەك "PKK" لەم مژارەدا ئەوەی بكەوێتە سەرمان جێبەجێی دەكەین.

سەرحەد بوجاك: بەڕێز ئیسماعیل بێشكچی پەیامێكی بۆ كۆنفرانسی ئەنجوومەنی نەتەوەیی لە ئەوروپا ناردبوو، دەیگوت پێویستە لەسەر ئەنجوومەنی نەتەوەیی بناخەڕێژكردن و بونیادنانی برایەتی كورد و كورد بكاتە ئامانج و كاروخەباتی بۆ بكات و دەڵێت"  تا برایەتی كورد له‌گه‌ڵ كورد بونیاد و پتەو نەكرێ، ئەو برایەتییەی دەیانەوێ لە رۆژهەڵاتی ناوین دروستی بكەن لەسەر كاغەز دەمێنێتەوە" دەتوانم تێڕوانینەكانتان لەسەر ئەم مژارە وەربگرم؟

 رێبەر ئاپۆ: كۆنگرەی نەتەوەیی بێ گومان دەبێتە هەنگاوێكی زۆر گرنگ كە كورد لەمێژووی خۆیدا بۆ جاری یەكەم هەڵدەسن بە بونیادنانی بەڕێوەبەرایەتی بۆ خۆیان، بەتایبەتی ئاستێك كه‌ بتوانن كۆتایی بە پۆلیتیكا سەخت و ناهەموواری "پەرتكە و زاڵبە" بێنن، پۆلیتیكای "بە گوتەی داگیركەران" كورد بە كورد شكاندن پوچەڵ بكەنەوە. دەشێ بگوترێ بۆ جاری یەكەمە پێكەوە ژیان و برایەتی بۆ جاری یەكەمە لەسەر بناخەیەكی راست بە شێوەیەك كە كۆتاییهێنان بە هەموو جۆرە گەمە و فێڵبازی و خەڵەتاندنێك بێنێت هۆشییاری و هۆشمەندییەوە بەواتای خۆی دەگات. بێ گومان هەموو تێكۆشانی تا ئێستاكەمان لەپێناو پێگەیاندنی پێكهاتەی راستەقینەی كورددا بووە، بەرژەوەندی نەتەوەیی درێژخایەن، بناخەی دیموكراتی، جێگەدان بە هەموو كەسێك لەچوارچێوەی رەنج و پێگەیدا بۆ جاری یەكەمە دەبینرێ و ئەنجامدەدرێ، هەروەها پاكتاوكردنی ئەو خیانەتەی كە سەدان ساڵە داگیركەران دەیسەپێنن، دەكەوێتە نێو هەل و توانستی هێنانە كایەوەی كوردی راستەقینەوە. هەموو لایەك دەبینن كە "PKK" نرخێكی بێ هاوتای دەدات بەمە، دەتوانم بڵێم گرنگییەكی گەورەی پێدەدات. "PKK" لەپێناو پێشخستن و گەشەكردنی برایەتییەكی بەوشێوەیە لەنێو كورداندا، بەنامووس، نەك بەتەنیا لە خزمەتی بەرژەوەندی یەكلایەنەدا، نەك لەسەر جیاوازی گەورە و بچووك، بەتەواوی بۆ رەخساندنی پێگەیەكی شیاو بە برایەتی و بە پرەنسیپ بوون لە خاوەنداریكردن و پشتیوانیكردنیشی، لەناو هەڵسوكەوت و جموجۆڵی پراكتیكیدا بووە و دەبێت، لە ئێستاش بەدواوە بە باشترین شێوە بۆ ئەوەی ببێتە باشترین شێوە ژیانی كورد و تەنانەت گرنگی دەداتە رەچاوكردنی بە نموونە وەرگرتنی لەلایەن گەلانی دراوسێشیەوە. لە هەموو كاتێك زیاتر بڕوامان بە جێبەجێ بوون وەدیهاتنی تێكڕای ئەوانە هەیە.

 1 ئادار 1993

پیاوێتی، واتای ئافراندنی جوانی و یه‌كسانی مه‌زنه‌!

ئه‌گه‌ر پیاوی کورد ئازادی فه‌تح نه‌کات و به‌شێوه‌یه‌کی بێ ئامان له‌گه‌ڵیدا ئاوێته‌ نه‌بێت، ئه‌وا بێگومان ده‌بێته‌ مه‌ترسیدارترین سه‌ره‌ڕۆ و بگره‌ دوژمنی ژنانیش...

دۆگماتیزم و مه‌زهه‌بگه‌رایی و ئایین له‌ یۆتۆپیای ئازادییدا

جیاوازێکی سه‌ره‌کیی یۆتۆپیای ئازادیی له‌ گه‌ڵ مۆدێرنیته‌ی سه‌رمایه‌داریی، وه‌فادارییه‌تی به‌رامبه‌ر به‌ ئه‌خلاق، لایه‌نگیرییه‌تی له‌ ئه‌خلاق و پاپه‌ندیی و شکۆمه‌ندیی و رێزگرتنیه‌تی له‌م ...

زیلان و سه‌ما نازناوی یەكانگیركردنی شەڕو ژیانن

ژنە میلیتانەكان بانگەوازی شەڕن. گەر دەمانهەوێ لە سەما و زیلانەكان بگەین، ئەوانە خواست و ئارەزووی بانگەوازی شەڕێكی گەورە و ژیانێكی پڕ خواست و واتادارانه‌ن. هەر دووكیان چەندە لەنێو یەكدان. هەمانە پرەنسیپێكن و ئێمەیش...

2017 © Partiya Karkerên Kurdistan (PKK)
[email protected]