21.09.2017

پیاوێتی، واتای ئافراندنی جوانی و یه‌كسانی مه‌زنه‌!

ئه‌گه‌ر پیاوی کورد ئازادی فه‌تح نه‌کات و به‌شێوه‌یه‌کی بێ ئامان له‌گه‌ڵیدا ئاوێته‌ نه‌بێت، ئه‌وا بێگومان ده‌بێته‌ مه‌ترسیدارترین سه‌ره‌ڕۆ و بگره‌ دوژمنی ژنانیش...

 

 

 

ئا: ماڵپه‌ری په‌كه‌كه‌

هه‌موو كاتێك به‌ گوێره‌ی فه‌لسه‌فه‌ی ئێمه‌ به‌هێزبوونی ژن به‌ هێزبوونی پیاوه‌، به‌هێزبوونی كۆمه‌ڵگایه‌. ماركس یش  ئه‌مه‌ی به‌ رسته‌یه‌كی به‌مجۆره‌ فۆرمیله‌ کردووه‌ "ئاستی ئازادی ژن، ئاستی ئازادی كۆمه‌ڵگایه‌". ئێمه‌ ئه‌وه‌مان به‌ره‌و پێشتر برد. ئاستی ئه‌و ئازادییه‌ی كه‌ له‌ژندا به‌دیهاتووه‌، ئاستی ئه‌و ئازادیه‌یه‌ كه‌ پیاوان پێی گه‌یشتوون. ئه‌و هێزه‌ی ژیان که‌لای ژن به‌دیهاتووه‌، هێزێکی ژیانه‌ که‌ لای پیاویش به‌دیهاتووه‌، هێزی ژیانه‌ که‌ له‌ كۆمه‌ڵگادا ده‌سته‌به‌ر بووه‌‌. ئه‌مانه‌ راستن. پێویسته‌ سه‌باره‌ت به‌م بابه‌تانه‌‌ هاوكار و یارمه‌تیده‌ر بن. نابێت فشار و سه‌ركوتكردن په‌یڕه‌و بكه‌ن، به‌ڵكو پێویسته‌ رێگایان له‌پێش بكه‌نه‌وه‌. نابێت كۆسپیان بۆ بنێنه‌وه‌ و تاكڕه‌و بن، به‌ڵكو پێویسته‌ گشتگیر و كۆمه‌ڵكار بن.

شتێكی زۆر مه‌ترسیداره‌‌ له‌ژنێكدا به‌دوای هێز و ژیاندا بگه‌ڕێیت كه‌ وه‌كو كۆیله‌ به‌ تۆوه‌ گرێدراوه‌. هێشتا به‌رامبه‌ر به‌ ژن پێویستی به‌ خۆ به‌هێزکردن ده‌بینم. ته‌نانه‌ت به‌ هۆی ئه‌و هێزه‌ سیاسیه‌ی نوێنه‌رایه‌تی ده‌كه‌م له‌خۆم پرسی كه‌ ئاخۆ ده‌رفه‌تی ئه‌شقم له‌ده‌ستدا؟ ئه‌مه‌ش ئه‌و واتایه‌ ده‌به‌خشێت؛ له‌میانی به‌هره‌ و تایبه‌تمه‌ندیه‌كانی كه‌سێتی خۆم باوه‌ڕیم هه‌بوو‌ ببم به‌ ئه‌ندامێكی ئه‌شق. ئه‌گه‌رنا ده‌توانم له‌رێگای پشت به‌ستن به‌ ده‌سه‌ڵاتی خۆم نه‌ته‌وه‌یه‌ك یاخود چینێك و ته‌نانه‌ت ره‌گه‌زێكیش بكه‌م به‌ كۆیله‌. به‌ڵام له‌وێدا ئه‌شق بوونی نابێت. مسۆگه‌ر ئه‌شق دیارده‌یه‌كه‌ په‌یوه‌ندی خۆی به‌ توانستی ئازادانه‌ی تاكه‌ كه‌سه‌وه‌ هه‌یه‌. كاتێك تا ئه‌م ئاسته‌ به‌رز و بێ به‌زه‌ییانه‌ هێز به‌رامبه‌ر ژن به‌كاربهێنرێت، ئه‌وا تۆ ئه‌شقی راسته‌قینه‌ ناخوڵقێنی، به‌ڵكو كۆیله‌یه‌كی بێ هاوتا ده‌خوڵقێنی. ده‌شێ گرێدراوی تۆ بێت، به‌ڵام ده‌بێته‌ هاوبه‌شی تاوانه‌كانت و ئه‌شق له‌نێوانتانا بوونی نابێت.

ئیدی به‌سه‌ با چیدی تایبه‌تمه‌ندییه‌ نه‌ریتی و كلاسیكیه‌كانی پیاو به‌كار نه‌هێنین. ئێمه‌ له‌م باره‌یه‌وه‌ باسی كوشتنی لایه‌نه‌ قه‌به‌‌كانی پیاومان كرد. نابێ‌ هێزی ره‌گه‌زی و جه‌سته‌یی به‌رامبه‌ر ‌ژنان به‌كاربهێنرێت، چونکه‌ ئه‌مه‌ هه‌م بێ ره‌وشتییه‌، هه‌م له‌بواری سیاسیش دژایه‌تی كردنی سۆسیالیزمه‌. له‌جیاتی ئه‌مه‌ پێویسته‌ خاوه‌نی كه‌سایه‌تییه‌ك بن كه‌ ژن به‌هێزبكات و ژیانی نوێش له‌نێو پیاواندا بێنێته‌ ئاراوه‌. ئه‌گه‌ر ئه‌م هێزه‌ پیشان بده‌ن پیاوێتیتان نامرێت، به‌ پێچه‌وانه‌وه‌ به‌ڵكو ناسنامه‌ی پیاوێك دێته‌ ئاراوه‌ كه‌ په‌سند بكرێت. پیاوێكی به‌مجۆره‌ ئه‌و پیاوه‌ نییه‌ له‌پێناو ژنێكی خاوه‌ن چه‌مكی راست و به‌ڕێز یاخود له‌پێناو هه‌ستێکی بچووك و حه‌زێكی وردیله‌ هه‌را بنێته‌وه‌، به‌ڵكو به‌واتای ئه‌و پیاوه‌ دێت كه‌ خۆشه‌ویستی ژن به‌گوێره‌ی خۆشه‌ویستی وڵات و ئازادی گه‌ل ده‌ستنیشان ده‌كات. ئه‌گه‌ر له‌م باره‌یه‌وه‌ سه‌ركه‌وتن به‌ده‌ست بێنێ، ئه‌وا ده‌بێته‌ پیاوێك كه‌ به‌ڕێزه‌وه‌ نزیكی ژن ده‌بێته‌وه‌ و  خۆشیده‌وێت. پێویسته‌ باش ئاگاداربن تا به‌و ئاسته‌ نه‌گه‌ن، ئه‌وا له‌ژێر كاریگه‌ری ئه‌و ته‌گبیرانه‌ی كه‌ پارتیمان وه‌ریگرتووه‌ ناتوانن له‌گه‌ڵ ژن له‌ناو ژیاندا په‌ره‌ به‌په‌یوه‌ندی بده‌ن. له‌ته‌گبیرێك زیاتر، پێویسته‌ ئه‌مه‌ وه‌ك به‌هایه‌كی مۆڕاڵی و فه‌لسه‌فه‌ی ژیان ببینرێت كه‌ به‌سه‌ر ژیان و ناسنامه‌كه‌ماندا زاڵه‌. پێویسته‌ به‌دڵشادی و جۆش و خرۆشه‌وه‌ ئه‌مه‌ ئه‌نجام بده‌ن.

له‌سه‌ر ئه‌م بنه‌مایه‌ په‌یوه‌ندیداربوون به‌ کار و خه‌باتی ژنانه‌وه‌، جۆش و خرۆش ده‌به‌خشێ‌ و به‌دڵنیاییه‌وه‌ هیچ ته‌نگه‌تاوییه‌ك دروست ناكات. ئه‌و ره‌مه‌ک و غه‌ریزانه‌ی بۆگه‌نن، له‌ئامانج دابڕاون، تاکڕه‌وانه‌ و دوور له‌شكۆمه‌ندین و ئه‌و په‌یوه‌ندییانه‌ی گه‌یشتوونه‌ته‌ خاڵی له‌ناوچوون، هێنده‌ی خیانه‌ت مه‌ترسیدارن.

ئه‌و هه‌ڵوێستانه‌ی كه‌ ژن بچووك ده‌كاته‌وه‌ و ته‌نانه‌ت خۆشی به‌شێوه‌یه‌کی راست و دروست شیکار نه‌کردووه‌ ئیتر گیانه‌ڵایه‌تی و روح ده‌دات. بێگومان ئه‌و هه‌ڵوێستانه‌ هیچ به‌هایه‌کیان نییه‌. به‌دڵنیاییه‌وه‌ له‌جیاتی ئه‌مه‌ پێویست به‌پیاوێك ده‌كات كه‌ باوه‌ڕی به‌هێزی ژنان هه‌بێت، لێی تێبگات و ‌ چه‌مكێكی راستی خۆشه‌ویستی به‌ده‌ست بێنێت. هه‌ر بۆیه‌ به‌ ئه‌ندازه‌ی‌ دڵنزمبوونی، پێویسته له‌شه‌ڕی وڵاتپارێزیشدا سه‌ركه‌وتوو بێت. هه‌ڵوێست و كه‌سایه‌تییه‌ك پێویست ده‌كات كه‌ نوقمی ناو تاكڕه‌وێتی نه‌بووبێت و هیچ شتێك له‌پێناویدا ره‌چاو نه‌كات و له‌سه‌ر بنه‌مایه‌كی كوێرانه‌ نزیكی ژنان نه‌بێته‌وه. خۆشه‌ویستی به‌كه‌سایه‌تیه‌كی سه‌ركه‌وتووه‌وه‌ گرێبدات و  هه‌ناسه‌ی له‌به‌ر نه‌بڕابێت، مه‌حكومی غه‌ریزه‌ی به‌رته‌سك نه‌بێت و چه‌مکی ‌موڵک و موڵكایه‌تی به‌ بنه‌ما نه‌گرێت. ئه‌گه‌ر له‌سه‌ر بنه‌مای كه‌سایه‌تی سه‌ركه‌وتنه‌وه‌ هه‌ڵوێست به‌رامبه‌ر به‌ژن پێشبخرێت ئه‌و كاته‌ ده‌شێ‌ كه‌په‌یوه‌ندی ئه‌و پیاوه‌ له‌گه‌ڵ ژنان به‌هادار بێت. پێویسته‌ باش بزانرێت كه‌ هه‌ڵوێستێكی پێچه‌وانه‌ی ئه‌مه‌ هیچ به‌هایه‌كی نییه‌. پیاوێك پشت به‌ژنی لاواز ببه‌ستێت ئه‌و پیاوه‌ش لاوازه‌، ئه‌و پیاوه‌ی پشت به‌ژنێكی كۆیله‌ ببه‌ستێ، كۆیله‌یه‌. پیاوێك كه‌ له‌سه‌ر بنه‌ماكانی ئازادی خاوه‌ن چه‌مك و تێگه‌یشتن نه‌بێت، ئه‌گه‌ر شۆڕشیش ئه‌نجام بدات، ئه‌وا له‌میانه‌ی ئه‌و چه‌مكه‌ی به‌سه‌ر كۆمه‌ڵگادا ده‌یسه‌پێنێ‌، نوێنه‌رایه‌تی چینی سه‌رده‌ست ده‌كات. هه‌روه‌كو ده‌زانرێت پیاوێك له‌نێو ئێمه‌دا نییه‌ شۆڕش ئه‌نجام بدات. هۆكاره‌كه‌شی ئه‌وه‌یه‌ كه‌ ئاستی ئازادی له‌خۆیدا شینه‌كردۆته‌وه‌ و چاره‌سه‌ره‌ی نه‌كردووه‌! به‌ڵكو به‌پێچه‌وانه‌وه‌ نزیكی ئه‌م كێشه‌یه‌ ده‌بێته‌وه‌، ئه‌گه‌ر له‌جیاتی هه‌ڵوێستی په‌رده‌پۆشكردن و سه‌ركوتكردن ئاستی تێگه‌یشتن و ئیراده‌مان به‌رزبكه‌ینه‌وه‌، ئه‌وا به‌ئه‌ندازه‌یه‌كی مه‌زن توانستی شه‌ڕ و تێكۆشانمان زیاتر ده‌بێت، به‌ڵام كاتێك به‌رامبه‌ر به‌غه‌ریزه‌كانتان تێكبشكێن و بكه‌ون، ئه‌وا ئازایه‌تی نامێنێت و له‌ناو ده‌چێت.

ئه‌گه‌ر پیاوی کورد ئازادی فه‌تح نه‌کات و به‌شێوه‌یه‌کی بێ ئامان له‌گه‌ڵیدا ئاوێته‌ نه‌بێت، ئه‌وا بێگومان ده‌بێته‌ مه‌ترسیدارترین سه‌ره‌ڕۆ و بگره‌ دوژمنی ژنانیش.

پیاو یاخود ژن، ئه‌گه‌ر تاوه‌كو دوایی خاوه‌نی وڵاتپارێزی و ئازادی بێت و له‌م پێناوه‌شدا شه‌ڕ و رێكخستن و به‌سوپابوون وه‌كو ئامرازی پێكهێنانی ئه‌وانه‌ ببینێت و له‌و رێگایه‌شدا هێزی فیکری و چالاکیه‌که‌ی و توانسته‌كانی خۆی بخاته‌ گه‌ڕ، ئه‌وا ئه‌م ژنه‌، یاخود ئه‌م پیاوه‌ به‌هاداره‌. ئه‌وانه‌ی له‌ قووڵاییه‌وه‌ ده‌ركیان به‌ڕاستینه‌ی خۆیان نه‌كردبێت، نابنه‌ خاوه‌ن شه‌ڕ و تێكۆشانێكی به‌رفراوان و تێر و ته‌سه‌ل. ئه‌وانه‌ی راستینه‌ی خۆیان ره‌چاو نه‌كه‌ن و له‌م پێناوه‌شدا نه‌كه‌ونه‌ نێو لێگه‌ڕینێك و بڵێن ئێمه‌ شه‌ڕی ئازادی به‌ڕێوه‌ده‌به‌ین، ئه‌مه‌ ده‌بێته‌ خۆ هه‌ڵخه‌ڵتاندن.

ئه‌و پیاوه‌ی كه‌ خۆشه‌ویستی و ژیانێكی یه‌كسان و هاوبه‌ش نه‌ناسێت، به‌تایبه‌ت له‌و خاڵه‌ی كه‌ تێیدا شه‌ڕی له‌ده‌ستداوه‌ په‌لاماری ژن ده‌دات، هه‌روه‌ها ژن وه‌ك ئامرازی هه‌ڵاتن و په‌رده‌پۆشکردن به‌كار دێنێت، ئه‌و پیاوه‌ی به‌هۆی قێزه‌وه‌نیه‌که‌یه‌وه‌ رق و كینه‌ی خۆی به‌سه‌ر ژندا داده‌ڕێژێت ئامرازی زوڵم و سته‌مکارییه‌. كه‌سانێک هه‌بوون ده‌یانخواست ژن بكه‌ن به‌ئامرازی ڤاڵا ده‌رخستنی شه‌ڕ و تێکۆشان، ئه‌مه‌شیان له‌ژێر ناوی به‌ڕێوه‌به‌ر و فه‌رمانده‌ییه‌وه‌ ئه‌نجا‌دا، به‌مڕه‌نگه‌ جارێكی تریش ئه‌و راستیه‌مان بۆ روون بوویه‌وه‌؛ ‌ هه‌م داگیرکه‌ر، هه‌م ئه‌و پیاوه‌ی  نۆكه‌رایه‌تی ئه‌و ده‌كات، له‌و باره‌وه‌ زۆر بێ ویژدان و بێ ئینسافن. له‌و شوێنه‌ی كه‌ ده‌دۆڕێنێ و بنده‌که‌وێ، یه‌کسه‌ر په‌لاماری ژن ده‌دات و  به‌كاری ده‌هێنێت.

لێره‌دا ئه‌گه‌ر باسی نموونه‌یه‌كی زه‌ق و ئاشكرا بکه‌ین‌؛ ئه‌و بێ‌ كاریگه‌ر بوون و سنووردارییه‌ی كه‌ دوژمن ده‌یخواست به‌سه‌ر ئێمه‌یدا بسه‌پێنێ‌، یه‌كێكی وه‌كو "شه‌مدین ساكیك" به‌جۆرێک پێكی ده‌هێنا كه‌ ته‌نانه‌ت دوژمنیش چاوه‌ڕوانی نه‌ده‌كرد، ئه‌و هێز و توانسته‌ی كه‌ له‌ناو پارتیدا كه‌وتبووه‌ ده‌ستی، كه‌ به‌هیچ جۆرێك شتێكی وای له‌بنه‌ماڵه‌ی خۆشیدا نه‌بینیبوو، به‌ قێزه‌وه‌نترین شێوه‌ به‌كاری ‌هێنا و به‌مڕه‌نگه‌ له‌سه‌ر بنه‌مای داڕووخان و یه‌کتری خستن پیاوی له‌به‌رامبه‌ر ژن، ژنی له‌به‌رامبه‌ر پیاو به‌كارده‌هێنا و خراپه‌كاری ده‌نایه‌وه‌، به‌مشێوه‌یه‌ ده‌یویست ئه‌نجام به‌ده‌ست بهێنێت. ده‌یخواست فه‌رمانده‌یی و سوپایه‌كی ساخته‌ و به‌كرێگیراو ئاوا بکات‌. به‌ڵێ وه‌كو ئاگادارن‌ یه‌كێك له‌چه‌كه‌ سه‌ره‌كیه‌كانی ئه‌و پڕاکتیکه‌ی، ئه‌وه‌ بوو كه‌ كچانی پارتی پێشكه‌شی پیاوان، پیاوانی پارتی پێشكه‌شی كچان بكات. واته‌ پشتی خۆی به‌شێوازێكی وه‌ها سه‌یر به‌ستووه‌ كه‌ ته‌نانه‌ت ئیبلیس یش په‌ی پێنه‌بردووه‌ و بیری لێنه‌كردۆته‌وه‌.

کاتێک كه‌سایه‌تی ژن و پیاو تا دواڕاده‌ لاوازن‌ و له ‌به‌رامبه‌ر زۆر و زه‌حمه‌تیه‌كاندا به‌رگه‌ ناگرن، هه‌روه‌ها له‌ بواری زایه‌ندی لێگه‌ڕینه‌کانی له‌ جوانی دابڕاو و له‌سه‌ر بنه‌مای تینوێتی و برسێتیه‌کی دژوار بێت، ئه‌وا ئه‌م چه‌مكانه‌ به‌جۆرێك زه‌ره‌ر و زیانیان پێگه‌یاندین كه‌ له‌هیچ كاتێكدا دوژمن نه‌یتوانیوه‌ به‌مڕه‌نگه‌ زیانمان پێ بگه‌یه‌نێت.

ئه‌گه‌ر سنوورێك بۆ ئه‌مه‌ دانه‌نرێت و رێگری لێنه‌کرێت، ئاشكرایه‌ كه‌ هیچ سوپایه‌كیش ناتوانێ‌ له‌به‌رامبه‌ر ئه‌م مه‌ترسیانه‌دا بوه‌ستێت.

 له‌به‌رامبه‌ر ئه‌مه‌دا ته‌گبیری ئێمه‌ چیبوو؟ به‌ڵێ، پێویسته‌ نکوڵی له‌غه‌ریزه‌كان نه‌كرێت، ‌ سه‌ره‌ڕای ئه‌و هه‌موو زۆری و زه‌حمه‌تیه‌ مه‌زنانه‌ خواستمان ئه‌م ده‌ره‌نجامه‌ ده‌ربخه‌ین. مادام دوژمن ئێمه‌ی تا ئه‌و راده‌یه‌ داڕووخاندووه‌، له‌به‌رامبه‌ر ئه‌مه‌دا به‌رپه‌رچدانه‌وه‌ به‌ پێشخستنی فره‌ لایه‌نه‌ی ره‌گه‌زه‌وه‌ ده‌بیت‌؛ له‌ ئاستی جه‌سته‌ییه‌وه‌ بگره‌ تا ده‌گاته‌ ئاستی چه‌مك، له‌تایبه‌تمه‌ندییه‌ ئه‌ستاتیكیه‌كانه‌وه‌ بگره‌ تا ده‌گاته‌ تایبه‌تمه‌ندییه‌ جه‌نگاوه‌ریه‌كان پێویسته‌ ره‌گه‌ز سه‌ربه‌خۆ و ئازاد بکرێت. هه‌روه‌ها ئه‌و راستیه‌شمان وه‌ک پڕه‌نسیپێکی سه‌ره‌کی به‌ بنه‌ما گرت كه‌ تاوه‌كو پیاو له‌ شه‌ڕ و تێکۆشاندا سه‌رنه‌که‌وێت و وڵات رزگار نه‌کات، ناتوانێ‌ ژیانێكی هاوبه‌ش له‌گه‌ڵ ژندا به‌سه‌ر به‌رێ‌، واته‌ به‌ئازادی ناگات. هه‌روه‌ها هه‌وڵماندا ئه‌مه‌ تاڕاده‌یه‌ك له‌كه‌سێتی خۆماندا به‌رجه‌سته‌ بكه‌ین و به‌م شێوه‌یه‌ش بگه‌ین به‌ئه‌نجام.له‌ڕاستیدا ده‌کرێ به‌شێوه‌یه‌كی زانستیانه‌ش‌ ئاماژه‌ی پێبکرێت؛ ده‌شێ وزه‌یه‌كی به‌م شێوه‌یه پێکبهێنرێت، واته‌ ئه‌گه‌ر غه‌ریزه‌ قه‌به‌کانی زایه‌ند و ته‌نانه‌ت غه‌ریزه‌ی برسێتیش بۆ رق و قینه‌ له‌به‌رامبه‌ر دوژمن، بۆ خولیا و حه‌سره‌تی ئازادی، بۆ له‌ناوبردن و ته‌ختکردنی قرێژیه‌كان ئاڕاسته‌ بگرێت، که‌سایه‌تی هه‌مه‌لایه‌نیش بکات به‌ جه‌نگاوه‌ری راسته‌قینه‌، ئه‌و به‌رهه‌مه‌ی دێته‌ ئاراوه‌ قاره‌مانێتی ژن و پیاوه‌.

یه‌كه‌مین شت ئه‌وه‌یه‌؛  كاتێک پیاو سه‌یری ژن و  YAJKده‌كات، مسۆگه‌ر ده‌بێ‌ وه‌ك هێزێك په‌سندی بكات که‌ له‌‌سه‌ر بنه‌مای پڕه‌نسیپه‌ باشه‌كانه‌. واته‌ ده‌بێ‌ وه‌كو چۆن ناوی خۆی ده‌زانێ‌ ئاوه‌هاش بگاته‌ ئه‌و راستیه‌ی كه‌ چیتر ناتوانێت وه‌كو رابڕدوو به‌پشت به‌ستن به‌ده‌سه‌ڵات، فه‌رماندارێتی و پیاوێتیه‌که‌یه‌وه‌ ژن بۆ خۆی به‌كار بێنێت.

دووه‌مین شت ئه‌وه‌یه‌، ئه‌گه‌ر پیاو خوازیاری ژن بێت، ئه‌وا پێویسته‌ باش بزانێت که‌  له‌سه‌ر بنه‌مای وڵاتپارێزیه‌وه‌ ده‌بێت، ئه‌مه‌ش له‌سه‌ر بنه‌مای كاری شه‌ڕ و تێکۆشانه‌وه‌ ده‌بێت‌، له‌شه‌ڕ و تێکۆشانیشدا پێویسته‌ سه‌رکه‌وتن و ئازادی به‌ده‌ست بێنێت. كه‌واته‌ ئه‌و پیاوه‌ی كه‌ خاوه‌نی سه‌ركه‌وتن نه‌بێت نابێ‌ له‌گه‌ڵ ژندا بژی. هه‌ڵبه‌ته‌ ئه‌مه‌ مه‌ترسیداره‌. واته‌ ئه‌و پیاوه‌ی نابووت بووه‌ ‌و له‌شه‌ڕدا دۆڕاندوویه‌تی، نابێ‌ داخوازی ژن بكات. به‌ کورتی هه‌رگیز ناڵێم با په‌یوه‌ندی تایبه‌ت هه‌بێت. ئه‌گه‌ر پیاو رێز و خۆشه‌ویستی بۆ ره‌گه‌زی ژن پیشان بدات و به‌شێوه‌یه‌كی راست و دروست ره‌فتاری له‌گه‌ڵدا بکات، یاخود ئه‌گه‌ر ژنیش له‌سه‌ر بنه‌مای ئازادی و یه‌كسانی ـــ به‌واتای تایبه‌ت ئه‌مه‌ ناڵێم ـــ وه‌كو چه‌مكێك و ته‌نانه‌ت له‌بواری ژیانیدا بخوازێت پیاو په‌سند بكات، له‌و چوارچێوه‌یه‌دا لێپرسینه‌وه‌ له‌گه‌ڵ‌ خۆیدا بكات‌، ئه‌گه‌ر پیاویش له‌سه‌ر ئه‌م بنه‌مایه‌ YAJK  په‌سند بكات، ئه‌و كاته‌ په‌یوه‌ندییه‌كان، خۆشه‌ویستی و ئه‌شق واتادار ده‌بێ‌. ئه‌گه‌ر به‌وجۆره‌ نه‌بێت، ئه‌وا پێویسته هێزه‌کانی‌ YAJK بزانن که‌ ئه‌وانه‌ ‌دوژمنن.

با هێزی YAJKو خه‌باتگێڕانی سه‌یر بكه‌ن؛ ئه‌گه‌ر وڵاتپارێزی له‌پیاودا پێشنه‌كه‌وتووه،‌ پێداگری و سه‌ركه‌وتنێكی له‌ شه‌ڕدا نییه‌، له‌گه‌ڵ راستینه‌ و داخوازی پارتی یه‌كانگیر نابێ‌؛ پێویسته‌ ئه‌و پیاوه‌ وه‌ك دوژمن په‌سند بكه‌ن. له‌م میانه‌شدا به‌ڕوون ‌و ئاشكرایی ده‌ڵێم؛ له‌ڕاستیدا پیاوێكی به‌مجۆره‌ یاخـــود ژنێكی به‌كرێگیراو (ژنیش هه‌یه‌ له‌پیاو ده‌چێت) سیخوڕی بابه‌تین. له‌م خاڵه‌دا چه‌كی ته‌ڤگه‌ری ئازادی ژن‌ له‌ ژن زیاتر، چه‌كی گۆڕین و وه‌رچه‌رخاندنی پیاوه‌. هێزی راسته‌قینه‌ی گرێدانێتی به‌شه‌ڕ ‌و پارته‌وه‌.

ئه‌گه‌ر پیاو خاوه‌ن چه‌مكێکی راست بێت و ژن به‌هادار ببینێت، خۆشی بوێت و بخوازێت له‌گه‌ڵیا ببێته‌ هه‌ڤاڵێكی باش و پێشی بخات و خزمه‌ت به‌ به‌هێزبوونی بكات؛ ئه‌وا پێویسته‌ غه‌ریزه‌ و باڵاده‌ستی خۆی بخاته‌ لایه‌ك و له‌سه‌ر بنه‌مای گوته‌ی "ژن ‌واتای ژیانه"‌ هه‌ڵوێستێکی به‌پره‌نسیپ، دڵنزم و راستگۆیانه‌ به‌رجه‌سته‌ بكات. به‌دڵنیاییه‌وه‌ ئه‌گه‌ر به‌مجۆره‌ نه‌بێت ئه‌گه‌ر منیش بم، ئه‌وا پێویسته‌ رێز له هیچ ‌پیاوێک نه‌گیرێت.

لێره‌دا هێنانه‌وه‌ی یه‌ك ـــ دوو رسته‌ی "فكری بایگه‌ڵدی" سوودێكی زۆری هه‌یه‌ كه‌، وه‌كو هه‌ڤاڵێك زۆر به‌جوانی له‌ئێمه‌ تێگه‌یشتووه‌؛ له‌ نامه‌که‌یدا ده‌ڵێت: له‌شارۆچكه‌ی لیجه‌ی سه‌ر به‌ئامه‌د وه‌كو منداڵی خێزانێكی باش هاتۆته‌ دونیاوه‌، له‌زیندانی " سه‌قاریا " بۆ زیندانی ئه‌سته‌نبووڵ گوێزرامه‌وه‌. له‌ساڵی 1994 دا به‌تاوانی ئه‌ندامێتی رێكخستن سزا درام و ئه‌وه‌ نزیكه‌ی چوار ساڵه‌ له‌زیندانی "چانقایا" دام.

سه‌رۆكی من!

تۆم زۆر خۆشده‌وێت. ته‌نیا له‌‌و چوارچێوه‌یه‌ی بۆ ئه‌شقت دیاریكردووه‌، ده‌توانم خۆشه‌ویستی خۆم له‌به‌رامبه‌رت ده‌رببڕم. چونكه‌ ئه‌مه‌ ئه‌شقێكی شكۆمه‌ند و پیرۆزه‌، له‌كه‌سێتی تۆدا ئه‌شق: بوون به‌ گه‌ل و شه‌هیدان و مرۆڤایه‌تییه‌. تۆ ته‌واوی ئه‌وانه‌ت له‌كه‌سایه‌تی خۆتدا كۆكردۆته‌وه‌. تۆ ئه‌و كه‌سایه‌تییه‌ زانا و بلیمه‌ته‌ی كه‌ ته‌واوی ئه‌وانه‌ له‌ئاستێكی به‌رزدا په‌یڕه‌و و به‌رجه‌سته‌ ده‌كه‌یت. تۆ تاكه‌ كه‌س نیت، به‌ڵكو چینێك و كۆمه‌ڵگایه‌كی. له‌به‌رئه‌وه‌ی چین و كۆمه‌ڵگایه‌كی ئه‌مه‌ وایكردووه‌ كه‌ ئیمپریالیزم به‌شێوه‌یه‌كی دژوار هێرش بێنێته‌ سه‌رتۆ. ئه‌وه‌ی كه‌ هه‌ره‌ زێده‌ ئیمپریالیزم و هاوپه‌یمانه‌كانی لێیده‌ترسن ئه‌وه‌یه‌ كه‌ كورد ببێته‌ خاوه‌ن هێز و ده‌سه‌ڵات. ئه‌مڕۆ هۆكاری سه‌ره‌كی گه‌یشتنی گه‌لی كورد به‌م ئاسته‌، ده‌گه‌ڕێته‌وه‌ بۆ هه‌وڵه‌ مه‌زنه‌كانت، شێلگیڕی و به‌بڕیاربوونت له‌سه‌ر نه‌هێشتنی كۆیلایه‌تی له‌كوردستان. بێگومان ئه‌م هه‌وڵه‌ مه‌زنانه‌ی تۆ، یه‌ك به‌ یه‌ك به‌رهه‌م ده‌دات.

مه‌سه‌له‌ی مارژینال و بێكاریگه‌ركردن مایه‌پو‌چکراوه‌ كه‌ هه‌وڵیاندا به‌سه‌ر پارتیدا بسه‌پێنن. ئه‌و شێوازه‌ی په‌یڕه‌وتکردووه‌ وایکردووه‌ یونیتاگه‌رایی  (UNITA) به‌مردوویی له‌دایک بێت. له‌كه‌سێتی فاکته‌رێکی وه‌ک شه‌مدین پووچه‌ڵكراوه‌ته‌وه‌. ئیدی هیچ هێزێك ناتوانێ‌ په‌ره‌سه‌ندنه‌كانی  PKK ئاسته‌نگ بکات، چونكه‌ PKK بۆته‌ موڵكی مرۆڤایه‌تی. ئامانجی رزگاركردنی سروشت و مرۆڤایه‌تییه‌. به‌ ئامانجکردنی رزگاركردنی سروشت گرنگه‌ و  بزووتنه‌وه‌یه‌که‌ له‌پراكتیكدا ئه‌وه‌ی سه‌لماندووه‌.

سه‌رۆكی من!

من له‌كه‌سێتی خۆمدا چه‌ندین چه‌مكی دووری راستینه‌ و پێوانه‌ی PKK به‌دی ده‌كه‌م. ئه‌و چه‌مكانه‌ی له‌كه‌سایه‌تی مندا دیارن به‌گشتی جیاوازییان نییه‌ له‌گه‌ڵ راستینه‌ی كوردی كۆن. واته‌ ئه‌و شیکارانه‌ی له‌قۆناخه‌ جیاوازه‌کاندا و به‌شێوه‌یه‌كی به‌رفراوان سه‌باره‌ت به‌كه‌سایه‌تی "ئامه‌د" ئه‌نجامتداوه‌، ئه‌وه‌ بۆ منیش راستییه‌كه‌، هه‌ر بۆیه‌ ناخوازم دو‌وباره‌ باسی ئه‌و چه‌مك و كێشانه‌ بكه‌مه‌وه‌. له‌و راپۆرته‌ی بۆ كۆنفرانسم رێكردووه‌ ته‌واوی ئه‌و خاڵانه‌م روونكردۆته‌وه‌. ئیتر له‌جیاتی دووباره‌ و سێباره‌کردنه‌وه‌ی ئه‌و كێشانه‌ی كه لای هه‌موومان‌ ده‌زانرێت، ده‌بێ‌ له‌بواری پراكتیكیدا جێبه‌جێی بکه‌ین. ئێمه‌ ته‌نیا و ته‌نیا به‌م شێوازه‌ ده‌توانین له‌شه‌ڕدا سه‌ركه‌وتن و له‌ژیاندا ئازادی راسته‌قینه‌ به‌رجه‌سته‌ بكه‌ین.

شه‌هیدان ناخوازن هه‌ر یه‌ك له‌ئێمه‌ ببینه‌ دیماگۆجێك. به‌ڵكو ده‌خوازن خۆمان بگه‌یه‌نینه‌ كه‌سێتیه‌كی زانا و بلیمه‌ت و تێگه‌یشتوو، واته‌ كه‌سێتییه‌ك كه‌ ئاخافتن و پراكتیك ئاوێته‌ی یه‌كتری بكات و پێكی بهێنێ‌. واتا ئه‌و كه‌سایه‌تیانه‌ن كه‌ گووته‌ و چالاكییان یه‌كانگیركردووه‌.

له‌دوایین نامه‌یدا كه‌ هه‌ڤاڵ "سه‌ما" به‌جێی هێشتووه‌، سه‌رنج بۆ سه‌ر ئه‌و كێشانه‌ راده‌كێشێ‌. هه‌ڤاڵه "سه‌ما" فه‌رمانده‌ی منه‌ و له‌م چالاكیه‌مدا سه‌ربازێكی ساده‌ی ژنه‌ كوردی فه‌رمانده‌ "سه‌ما یوجه‌"م. سه‌رباز ناچاره‌ له‌چوارچێوه‌ی فه‌رمانی فه‌رمانده‌كه‌یدا بجووڵێته‌وه‌، منیش له‌ ئاست تێگه‌یشتنی ئه‌و ناچاریه‌دام. هه‌ر بۆیه‌ ئه‌م چالاكییه‌ ئه‌نجام ده‌ده‌م، ئه‌وه‌ی لێی تێگه‌یشتووم ده‌ربازی پراكتیكی ده‌كه‌م. له‌‌و بڕوایه‌دام که‌ شایسته‌ بوون به‌ تۆ و شه‌هیده‌ قاره‌مانه‌كانمان به‌م رێگایه‌دا تێپه‌ڕ ده‌بێت. من به‌م چالاكییه‌ چالاكی هه‌ڤاڵه‌ سه‌ما شكۆمه‌ندتر ده‌كه‌م . وه‌كو بۆمبایه‌ك به‌مێشكی دوژمندا ده‌ته‌قمه‌وه.

ئه‌و جیاوازیه‌ی لێره‌دا هه‌یه‌ قووڵبوونه‌،‌ هه‌ندێك له‌و كه‌موكورتیانه‌‌ ته‌واو ده‌کات كه‌ له‌ئارادان. ده‌ڵێ: كه‌موكورتی كه‌سایه‌تی پیاو له‌ مندا زۆره‌.  له‌ڕاستیدا بیرکردنه‌وه‌یه‌کی له‌م جۆره‌ که‌ له‌میانی چالاکیه‌کی قاره‌مانێتیه‌کی به‌مڕه‌نگه‌ و له‌سه‌ر بنه‌مای شیکاره‌کانی كه‌سایه‌تی "ئامه‌د" ـه‌وه‌ که‌موکورتیه‌کان نه‌هێڵێ و پڕیان بکاته‌وه‌، هه‌روه‌ها پراكتیزه‌كردنی ئه‌م چالاکییه‌ به‌ئاماده‌كاریه‌كی مه‌زنه‌وه‌، خۆی له‌خۆیدا داستانێكه‌.

هه‌روه‌ها له‌میانی چالاکیاکه‌یدا باس له‌وه‌ ده‌كات كه‌ سه‌ربازێكی ساده‌ی ژنه‌ كوردی فه‌رمانده‌ "سه‌ما یوجه‌"م. لێره‌دا قووڵی مانا جێگای باسه‌،‌ مه‌زنایه‌تیش لێره‌دایه‌. من له‌نووسراوه‌كه‌ی ئه‌م هه‌ڤاڵه‌ماندا تێده‌گه‌م كه‌ زۆر خوێنده‌واره‌ و بۆ ئه‌نجامدانی ئه‌م چالاكیه‌ش به‌ساڵان بیری كردۆته‌وه‌. ئه‌و به‌شێوه‌یه‌كی هه‌ڕه‌مه‌كی و به‌هه‌ستێكی ساته‌وه‌ختی ئه‌م چالاكییه‌ی ئه‌نجام نه‌داوه‌. ئه‌و هه‌ڤاڵه‌ خاوه‌ن كه‌سایه‌تیه‌كی رۆشنبیره‌. ‌ساڵانێک ئه‌و چالاكییه‌ قاره‌مانانه‌ی خوێندۆته‌وه‌ كه‌ ئه‌نجام دراون، تا راده‌یه‌کی زۆر  چالاكی ئه‌و ژنه‌ ملیتانانه‌ی هه‌رس کردووه‌ که‌ له‌توركیا خۆیان سووتاندووه‌ یان له‌چالاكی مانگرتندا شه‌هیدبوون، هه‌روه‌ها له‌ته‌واوی شه‌هیدانی دیكه‌شمان تێگه‌یشتووه‌. ئه‌م هه‌ڤاڵه‌ به‌هۆی كێشه‌ی چینایه‌تی، واتا له‌ئه‌نجامی كێشه‌ ماددییه‌كان ته‌ڤلی ریزه‌کانی رێکخستن نه‌بووه‌. به‌ڵكو تادواڕاده‌ له‌سه‌ر بنه‌مای پره‌نسیپی زانستی و باوه‌ڕییه‌وه‌ وه‌ك پێداویستییه‌ك بۆ به‌رجه‌سته‌كردنی ئه‌مانه‌ ته‌ڤلی بووه‌، به‌مڕه‌نگه‌ به‌پارتی بوونیشی پێكهێناوه‌. كه‌سێكی زۆر جیاواز بووه‌ ‌و زیاتریش ده‌ركی به‌‌و مرۆڤه‌ كردووه‌ كه‌ ئێمه‌ هه‌وڵمانداوه‌ هه‌ڵیبسه‌نگێنین. دڵنیام ئه‌گه‌ر به‌و ئیراده‌ مه‌زن و هێزه‌ هزریه‌وه‌ بژیابایه‌، ئه‌وا یه‌كێ له‌خۆشه‌ویستترین هه‌ڤاڵان ده‌بوو. خۆزگه‌ بژیابایه‌، بمانتوانیبوایه‌ په‌روه‌رده‌یان بكه‌ین یاخود هه‌رهیچ نه‌بێت هه‌ندێک کۆمه‌ک و یارمه‌تیمان دابوایه‌. وه‌لێ ئه‌مه‌ ئه‌و خاڵه‌یه‌ كه‌ ئێوه‌ ناتوانن لێی تێبگه‌ن، ئه‌مه‌ش زۆر سه‌یر و به‌رچاوه‌‌.

ئه‌گه‌ر تائێستا ئێوه‌ كاریگه‌ری چالاكی ئه‌م هه‌ڤاڵانه‌تان له‌سه‌ر نه‌بێت، ئه‌‌وا پێتان ده‌ڵێم: نزیكی مه‌بنه‌وه‌!  چونكه‌ ئه‌مه‌ له‌به‌رامبه‌ر راستینه‌ی بێ‌ رێزییه‌. سه‌یر كه‌ن ده‌ڵێن ئه‌گه‌ر ئێمه‌ له‌ده‌ره‌وه‌ بووینایه‌؛  له‌و بڕوایه‌دام ئه‌گه‌ر ئه‌مه‌یان بۆ فه‌راهه‌م ببوایه‌ پێداویستی باشترین كه‌سێتی فه‌رمانده‌یان له‌هه‌ر شه‌ڕێك، له‌هه‌ر کار و خه‌باتێكدا جێبه‌جێ‌ ده‌كرد. ئه‌مه‌ ئه‌نجامێکی مه‌زنه‌، بۆیه‌ ئێمه‌ ناچارین ئه‌مه‌ به‌ بنه‌ما وه‌ربگرین. له‌ نووسراوه‌که‌یان شتێکیان بۆ ئه‌وانه‌ی ‌دواوه‌ش نووسیوه‌ و ده‌ڵێن: به‌ڕه‌خنه‌ له‌خۆ گرتنێكی ساخته‌، ته‌نانه‌ت به‌ شێوازی‌ كه‌سایه‌تی ئه‌و ژن و پیاوه‌ی دوژمن پشتی پێبه‌ستووه‌ ناتوانین به‌رده‌وام بین.

واتای ئه‌م دوو شه‌هید بوونه‌ لێره‌دایه‌. ره‌خنه‌ی زۆر تووندیان له‌ئێوه‌ هه‌یه‌. مسۆگه‌ر پێویسته‌ به‌هه‌ندی وه‌ربگرن و جددی نزیكی ئه‌و ره‌خنانه‌ ببنه‌وه‌. منیش لای خۆمه‌وه‌ بیره‌وه‌ری ئه‌و هه‌ڤاڵانه‌ به‌رز و پیرۆز راده‌گرم و هیوا و داخوازیه‌كانیان جێبه‌جێ‌ ده‌كه‌م.

 

هه‌ڵبژارده‌یه‌ك له‌ دیالۆكه‌كانی ڕێبه‌ر ئاپۆ له‌گه‌ڵ هه‌ڤاڵان له‌ گۆره‌پانی بقاع له‌ ساڵی نه‌وه‌ده‌كان

شەڕی باشووری كوردستان، تەنیا لەدژی بەكرێگیراوی و خیانەت نەبوو، شەڕی

كۆنگرەی نەتەوەیی بێ گومان دەبێتە هەنگاوێكی زۆر گرنگ كە كورد لەمێژووی خۆیدا بۆ جاری یەكەم هەڵدەسن بە بونیادنانی بەڕێوەبەرایەتی بۆ خۆیان، بەتایبەتی ئاستێك كه‌ بتوانن كۆتایی بە پۆلیتیكا سەخت و ناهەموواری "پەرتكە و زاڵبە" بێنن...

دۆگماتیزم و مه‌زهه‌بگه‌رایی و ئایین له‌ یۆتۆپیای ئازادییدا

جیاوازێکی سه‌ره‌کیی یۆتۆپیای ئازادیی له‌ گه‌ڵ مۆدێرنیته‌ی سه‌رمایه‌داریی، وه‌فادارییه‌تی به‌رامبه‌ر به‌ ئه‌خلاق، لایه‌نگیرییه‌تی له‌ ئه‌خلاق و پاپه‌ندیی و شکۆمه‌ندیی و رێزگرتنیه‌تی له‌م ...

زیلان و سه‌ما نازناوی یەكانگیركردنی شەڕو ژیانن

ژنە میلیتانەكان بانگەوازی شەڕن. گەر دەمانهەوێ لە سەما و زیلانەكان بگەین، ئەوانە خواست و ئارەزووی بانگەوازی شەڕێكی گەورە و ژیانێكی پڕ خواست و واتادارانه‌ن. هەر دووكیان چەندە لەنێو یەكدان. هەمانە پرەنسیپێكن و ئێمەیش...

2017 © Partiya Karkerên Kurdistan (PKK)
[email protected]